ADDA dagiti wagas a mabalintayo a suroten tapno nabalballigi ti panagmulatayo. Padasentayo dagiti sumaganad.
1. No agmulaka, kas koma iti kamatis, siguraduem nga inton agapitka, saan a kaadu ti kamatis. Adunton ti kamatis ket kalaka ti kamatis. Adunto ti kakompetensiam. Siempre, no adu ti suplay, gagangay a nababbaba ti presio. Agbalin a nagosiante, saan a mannugal.
2. Pumili iti dua a kangrunaan nga imula. Mangpili met iti imula a mabalin nga isukatsukat.
3. Kas pagarigan agmula iti kamatis, saanmo a paggigiddanen nga imula amin tapno saan met nga aggigiddan a pagapitam. Adda baet ti panagmula ta no marsaak dagiti immun-una, adda pay la masindadaan a pagpurosam. Iti kasta, mataginayon ti suplay.
AGRIKULTURA: Padasen Dagitoy a Barayti ti Soybean
4. Makaited iti ganansia amin a mula. Ammuen dagiti pagkapsutan ken pagpigsaan dagitoy tapno ammom dagiti sumaruno nga aramiden.
5. Uray adu ti puonam no dimo ammo a maneharen a nasayaat. Kayatna a sawen, saan a sigurado ti balligi uray no adu ti kuarta a pagpuonan.
6. Ammuen a nasayaat dagiti yabono agraman dagiti aramaten a pestisidio ken insektisidio. Saan a basta agaramat. Kanayon nga ilista wenno irekord dagitoy.
7. Makiuman kadagiti eksperto kas kadagiti adda padasna.
8. No adda pannakabalinna, kissayan ti gastos a di maisakripisio ti kalidad ti apit.
9. Saan a baybayagen nga idulin ti apit. No alisto a maperdi, ilako iti agdama a presio.
10. No damdamo nga imula ti maysa a mula, padasem pay laeng. Dimo pay la ikakaadu ti imulam malaksid no addan nakitam a nakapadas iti daytoy ket nagballigi.
11. Agduma ’tay mabuybuya wenno mabasbasa laeng. Awan kas iti bukod a padas manipud panagmula agingga iti panaglako.
12. Siguraduen nga adda farm record. Ilista dagiti napipintas nga ekperiensia tapno isu manen ti aramiden iti sumaruno a panagmumula. Maysa daytoy a sistema ti panangmonitor kadagiti aramid iti talon.
13. Kaaduanna a dagiti met laeng kadaanan a barayti ti kapintasan nga imula.—O
