Inaprobaran ti Asian Development Bank (ADB) ti $1 a bilion a loan package para iti Filipinas, nga addaan iti dua a baro a programa iti pannakapasayaat ti disaster resilience ken dagiti programa ti labor market tapno maitandudo ti pannakapataud ti ad-adu pay a panggedan.
Addaan ti pautang a pondo iti dua a sag-$500 a milion a policy-based loans nga addaan panggep a mangipaay iti madagdagus a pinansial nga ayuda kadagiti tiempo ti didigra ken suporta kadagiti panangisayangkat ti gobierno a panagparnuay iti ad-adu pay ken nasaysayaat a pagtrabahuan.
"Ti Filipinas ti maysa kadagiti kapardasan ti panagdur-asna nga ekonomia iti Southeast Asia ngem addaan iti nangato a risgo iti pannakaginggined, panagbettak dagiti bulkan, panagbagyo, panagngato dagiti nibel ti baybay, ken panaglayus," kinuna ni Pavit Ramachandran, ADB Country Director for the Philippines.
"Iti daytoy a programa, panggepmi ti mangtulong a mangitandudo iti kapasidad ti Filipinas para iti disaster risk reduction and management (DRRM) iti nasional ken lokal nga agpang, a pakairamanan dagiti kukua ken manmaneharen ti estado a korporasion; mangpapigsa kadagiti polisia ken frameworks ti DRRM; ken mangtun-oy iti long-term reslience tapno makissayan ti epekto dagiti didigra, nangruna kadagiti kakaruan a maapektaran a sektor," kinuna pay ni Ramachandran.
Pastor Quiboloy, naisublin iti Pasig City Jail
Ti met maikadua nga ADB loan ket addaan panggep a mangpasayaat iti produktibidad ken employability dagiti Filipino a mangmangged kabayatan ti pannakaipasdek ti paborable nga investment environment para kadagiti negosio.
“Idinto a makaparegta ti job recovery iti Filipinas iti panawen kapasan ti Covid-19, agtalinaed a kritikal a pakaseknan ti kalidad dagiti pagtrabahahuan, nga adu pay laeng dagiti mangmangged a sumangsango kadagiti karit kas iti kinakurang ti panggedan, impormalidad, ken limitado a pannakagun-od kadagiti desente nga oportunidad iti pagtrabahuan,” kinunana ni Ramachandran.
“Daytoy baro a programa ti mangtaming iti dayta a kasapulan ken makatulong iti pannakaisagana dagiti mangmangged a Filipino para kadagiti higher-skilled jobs kas iti analytics ken artificial intelligence, software development ken security, ken business process management--dagiti industria a nakapaneknekanen iti paglaingan dagiti Filipino,” innayonna.
Panggep ti gobierno a paaduen ti pormal a panggedan iti pribado a sektor iti average a 600,000 agingga iti 700,000 a trabaho iti kada tawen.
Panggep pay ti programa a pangatuen ti bilang dagiti job placement babaen dagiti public employment service offices (PESO) kadagiti local government unit (LGU) iti entero a pagilian iti 120,000 iti tinawen ken ikaadu ti bilang dagiti LGU a mangipatpatungpal iti JobStart Philippines skills training program para kadagiti agtutubo. (MANILA BULLETIN)
