February 14, 2025

Home DAMDAMAG Nasional

Impeachment ni BP Duterte, ipukpukkaw dagiti raliyista

Impeachment ni BP Duterte, ipukpukkaw dagiti raliyista

Naguummong dagiti raliyista iti asideg ti People Power Monument iti Epifanio De Los Santos Avenue (EDSA), Quezon City ita nga aldaw, tapno gutigotenda ti nadaras a panagtignay ti impeachment complaint a naipila kontra ken ni Bise Presidente Sara Duterte.

Impeksa dagiti raliyista ti kiddawda iti Kamara a mangsalimetmet iti pagrebbenganda kadagiti Filipino.

Indauluan daytoy da Diputado Percival “Perci” Cendeña (Akbayan Party-list) a nangyendorso iti umuna nga impeachment complaint, ken Fr. Joel Saballa a nangibagi kadagiti nangipila iti maikatlo nga impeachment complaint.

Nakipaset dagiti nadumaduma a gunglo a kas iti ML Party-list, ni Magdalo Party-list Second Nominee Eugene Gonzales, Father Flavie Villanueva, Kiko Aquino Dee, EveryWoman, ti August Twenty-One Movement (ATOM), ken dagiti dadaulo ti SIKLAB, ti Nagkaisa Labor Coalition, Kalipunan, ti Student Council Alliance of the Philippines (SCAP), ASAP, Akbayan Youth, ken dadduma pay a gunglo.

Nasional

Pastor Quiboloy, naisublin iti Pasig City Jail

Segun kadagiti raliyista, masapul a ma-impeach ti Bise Presidente tapno masalakniban ti pondo ti publiko a mausar koma a mangpasayaat iti biag dagiti Filipino, a saan ketdi a para iti personal nga ambision.

Makipagkaykaysa dagiti raliyista kadagiti dadduma pay a raliyista kadagiti dadduma a lugar kas iti EDSA Shrine, Liwasang Bonifacio, ken Rizal Park, iti Manila.

Iti sabali a bangir, nangibaon ti Quezon City Police District (QCPD) iti 458 a polis tapno masigurado ti kinatalged dagiti raliyista ken dagiti motorista iti lugar. (Hannah Nicol/Manila Bulletin//Lito Hilidon/Bannawag)