Anamongan ni Sekretario ti Department of Health (DOH) Ted Herbosa ti substitute bill ti Senate Bill 1979 wenno ti Adolescent Pregnancy Prevention Bill, nga indatag ni Senadora Risa Hontiveros, ngem di rumbeng a mairaman ti gender issue iti singasing a linteg.
Segun ken ni Herbosa, narikut a pagsasaritaan ti teenage pregnancy, ket inaklonna a dakkel a parikut ti pagilian ti nasapa a panagsikog dagiti agtutubo.
Kinuna ni Herbosa a suportaranna ti ania man a linteg a mangtaming iti teenage pregnancy ngem dina anamongan no mairaman ti gender issue.
Impaganetget ni Herbosa nga uray awan ti singasing a linteg, addan dagiti agdama a paglintegan a mangsalaknib kadagiti babbai, kas iti Responsible Parenthood and Reproductive Health (RPRH) Act ti 2012 wenno Republic Act No. 10354. Patienna a ti umisu a pannakaipatungpal daytoy a linteg ti mangtaming iti parikut iti reproductive health iti pagilian.
Kinuna ni Herbosa nga agkurkurang ti mannursuro a makabael a mangiwayat iti health education kadagiti pagadalan, ket dinagadagna ti Department of Education (DepEd) a tamingenda koma daytoy.
Maibatay iti datos ti Philippine Statistics Authority (PSA), bimmaba ti bilang ti teenage pregnancy kadagiti Filipina nga agtawen iti 15 agingga iti 19, manipud 8.6 a porsiento idi 2017 nagbalin a 5.4 a porsiento idi 2022.
Ngem adda 35 a porsiento a ngimmatuan ti bilang dagiti nayanak kadagiti balasitang nga agtawen iti 15 ken agpababa, manipud iti 2,320 idi 2021 nagbalin a 3,135 idi 2022. (Jel Santos/Manila Bulletin//Lito Hilidon/Bannawag)