
Patien ni Presidente Ferdinand E. Marcos Jr. nga adda a talaga dagiti sleeper cell wenno espia nga Intsik iti Filipinas kalpasan ti pannakaarestar ti lima a Chinese nationals gapu iti mapapati nga espionage (panagespia) nga aktibidad dagitoy iti Palawan ken Manila.
Imbatad daytoy ni Marcos kalpasan a mai-report a natiliwan dagiti nasao a Chinese national, nga agpampammarang a kas turista a Taiwanese, a mangretretrato ken mangibid-video iti maysa a barko ti Philippine Coast Guard (PCG) ken nangyinstolarda pay iti CCTV camera iti maysa a kayo ken impaturongda ti nasao a kamera iti baybay.
Segun ken ni Marcos, adda a talaga dagiti espia nga Intsik iti Filipinas "gapu sumagmamano kadagiti naarestar ket nabayagen nga adda ditoy ken nakaasawadan kadagiti Filipina."
"Sleeper a talaga. 'Tay makunkuna nga sleeper," innayonna. Maysa a grupo dagiti tattao ti sleeper cell, nga agbibiag a sililimed ken agur-uray a maawagan wenno mapagtignay para iti espesipiko a mision. (Argyll Cyrus Geducos/MB)