Impaganetget ni Sen. Mark Villar ti napateg nga akem dagiti impraestruktura iti ad-adda pay a pannakaipairut ti linnangen dagiti kameng ti pamilia. Dinakamatna a ti masansan a kinairut ti trapiko ken saan a napintas a wagas ti transportasion ti kangrunaan a mangdaddadael iti kaadda koma ti umdas nga oras a panagkikita dagiti kameng ti pamilia. Gapu iti daytoy, kiniddaw ni Villar kadagiti policymakers, developers, ken dagiti stakeholders a mangibaliw koma iti imatangda tapno ipasdekda dagiti impraestruktura a pudpudno a para iti pagsayaatan dagiti umili.
Pannakapasayaat ti Biahe, Nayonanna ti Oras a Para iti Pamilia
Kas kuna ni Senador Villar, dagiti awan kaes-eskanna nga atiddog a biahe ken dagiti nairut a trapiko, takawenda dagiti napapateg nga oras a kaadda koma dagiti mangmangged iti sidong dagiti ipatpategda iti biag. “Babaen ti pannakapasayaat ti para iti publiko a transportasion, pannakaaramid dagiti nasayaat ti pannakamantenerna a kalsada, ken pannakapaannayas ti trapiko, maikabassit dagiti madaddadael nga oras,” kinunana.
Innayonna a no basbassit ti oras dagiti nagannak a kaaddada kadagiti kalsada, ad-adu ti maipaayda nga oras iti panangtaripatoda kadagiti annakda ken iti pannakapasantak ti biagda a sangapamilia—dagiti elemento, a kas kunana, isuda dagiti panuli ti kultura a Filipino.
Sonza, Sasot, Banat By, pinaayaban ti tri-comm ti Kamara
Pannakayasideg Dagiti Kangrunaan a Kasapulan
Malaksid kadagiti nasaysayaat a kalsada ken wagas ti transportasion, impaganetget pay ni Villar ti kinapateg ti pannakabangon dagiti pagadalan, balay-pagagasan, ken community centers iti asideg iti pagnaedan dagiti tattao.
“No dagiti kangrunaan a kasapulan ket addada laeng iti asideg, nalaklaka laeng a maatendaran dagiti nagannak dagiti okasion nga angayen dagiti eskuela, matamingda dagiti emerhensia a panagkasapulan, ken makapartisipar a sinanam-ay kadagiti lokal nga aktibidad,” kinunana.
Innayonna a para kadagiti pamilia a madukotan kadagiti trabahoda, iti edukasion, ken kadagiti annongenda iti pagtaenganda, ti kaasidegda kadagiti kangrunaan a kasapulanda, ikabassitda ti inaldaw a pannakaburiborda, ken pasayaatenna ti pannakilangenda kadagiti bukodda a komunidad.
Natalged Para iti Pannagna ken Koneksion iti Internet
Dinakamat pay ni Senador Villar ti kinapateg dagiti impraestruktura a natalged para iti pannagna ken panagusar iti bisikleta ta makatulong dagitoy iti pannakapasalun-at ti bagi ken pannakapaadda ti ad-adu a gundaway para iti pamilia a makapagpasiar iti ruar nga awan dagiti makasinga nga asuk ti lugan. Malaksid itoy, ti pannakapaadda ti nasayaat a koneksion iti internet, luktanna ti gundaway para iti mabalin a pannakabaliw ti oras ken wagas ti panagtrabaho ta mabalinen dagiti nagannak ti agtrabaho iti uneg dagiti balayda, ngarud maaddaanda iti ad-adu nga oras a mangtaripato iti pamiliada ken mangiwakas kadagiti aramidda iti balay.
Impraestruktura a Pudno nga Agserbi Kadagiti Filipino
Kiniddaw ni Senador Villar iti gobierno ken iti sektor pribado a kitaenda koma a ti impraestruktura ket saan laeng a panagaramid kadagiti kalsada ken panagbangon kadagiti pasdek no di ket panagparnuay, kangrunaanna, kadagiti aglawlaw a pakapasantakan koma ti pamilia.
“Ti impraestruktura ket maipanggep iti pannakapataud dagiti aglawlaw a pagbiagan dagiti pamilia, dagiti umili, a sisasalun-at,” inggunamgunamna.
Babaen ti panamagtitipon kadagiti napasayaat a disenio, makapnek a pannakaplano dagiti lugar, ken makapnek met a koneksion iti internet, mamati ni Villar a mapasubli dagiti napukaw nga oras a para iti pamilia idinto a mapatibker met dagiti linnangen a mangbukel iti nabileg a pundasion ti gimong.
Maysa a Napabaro a Sirmata Para iti Pagilian
Bayat a dumakdakkel dagiti siudad, daytoy a kapanunotan ni Villar maipanggep iti pannakaisentro koma ti panagrang-ay iti pagsayaatan ti pamilia ket agkasapulan kadagiti solusion tapno marisut ti kumarkaro a kinairut ti trapiko ken iti panagbaliw ti kasasaad dagiti komunidad.
Inggibusna: “No mapagbalintayo a dagiti impraestruktura ket pudno nga agpaay kadakatayo, mapagbalintayo ti Filipinas a napimpintas a lugar a pagnaedan. Babaen ti epektibo a panagplano ken panangikumittayo a maipaay kadagiti umili dagiti dekalidad a serbisio publiko, mangnamnamatayo a ti tunggal pamilia a Filipino, maaddaan iti panawen ken kadagiti gundaway tapno sangsangkamaysada a tumanor a sidudur-as.”
Babaen ti panamagbalin iti pamilia a kas sentro ti nailian a panagdur-as, daytoy a sirmata ni Senador Villar, mabalin a baliwanna no kasano nga aggunay dagiti Filipino, no kasano nga agbiagda, ken no kasano a makapaglilinnangenda kadagiti masungad a tawen—saan laeng nga iti panagaramid kadagiti kalsada, no di ket iti pannakabangon ti gimong a nair-irut ti panaglalangen dagiti kamengna ken addaan panangigaga iti tunggal maysa.
