Inyam-ammo itay nabiit ni Women’s Rights Advocate Camille Villar ti maysa a baro nga inisiatibo nga agpanggep a mangipasdek kadagiti “Care Blocks” kadagiti lokal a komunidad iti sapasap a Filipinas.

Nainspirar ni Villar kadagiti kapipintasan nga aramid iti sangalubongan maipanggep kadagiti makuna a komunidad nga adda laeng iti asideg dagitoy dagiti kangrunaan a kasapulan dagiti agindeg.

Babaen dagiti Care Blocks, mayasideg kadagiti umili dagiti kangrunaan a serbisio manipud iti pannakaaywan ti pisikal ken mental a salun-at agingga kadagiti programa iti edukasion ken iti pannakataripato dagiti ubbing – nga amin dagitoy, maaramid iti maymaysa nga aglawlaw.

Kuna ni Villar a ti konsepto ti Care Blocks ket saan laeng nga iti panagbangon kadagiti pasdek. Ketdi, ti tunggal paset, nairanta  nga addaan kadagiti espasio a para kadagiti medical clinics, mental health counseling, childcare centers, community education, ken  skill-building workshops. Maipatungpal daytoy a proyekto iti pannakitinnulong dagiti gobierno lokal, dagiti pribado nga institusion, ken dagiti gunglo sibiko, iti kasta manamnama a maipaay kadagiti pamilia dagiti pannaranay ken dagiti kasapulanda iti asideg dagiti pagtaenganda.

Nasional

'Show cause order' kontra kadagiti socmed vlogger, impaulog ti Tri-comm

Kuna ni Villar a napateg iti daytoy a gannuat ti pammati nga iti panangipasdek kadagiti kangrunaan a serbisio iti asideg kadagiti pagtaengan dagiti tattao, maikabassit ti oras ti biahe ken magastos, idinto a pabilegenna met ti panagkakadua ken panaglilinnangen dagiti kameng ti komunidad. Maibalay ngamin kadagiti Care Blocks dagiti klinika a mangipaay iti pangsaluad iti salun-at a kas kadagiti bakuna, pannakatsek-ap dagiti inna, ken regular a pannakaamiris ti salun-at.

Malaksid itoy, kuna ni Villar nga adda met mailatang nga espasio para iti panagbalakad (conseling), stress management workshops, ken pannakataripato ti salun-at ti utek (mental health care), a mangsungbat iti dumakdakkel a panagkasapulan iti emosional a pannarabay.

Babaen met ti pannakaitipon dagiti pasilidad a pakataripatuan dagiti ubbing ken kadagiti aktibidad iti panagsursuro, panggep met daytoy a gannuat a tulongan dagiti agtrabtrabaho a nagannak a mangbalbalanse iti orasda para iti trabahoda ken kadagiti responsibilidadda iti pamiliada.

Ni Camille Villar (kakanawanan) iti maysa a pannakiummongna iti grupo dagiti babbai. Am-ammo ni Villar a kas maysa kadagiti mangilablaban kadagiti karbengan dagiti babbai.

Mabenepisiaran pay dagiti residente kadagiti skill-building programs ken kadagiti community-based training sessions a nadesinio a mangpadakkel iti masapulanda ken mangparugso iti irarang-ay ti komunidad.

Tapno naan-anay ti pannakaipakat daytoy a sirmata, maaddaan ti tunggal Care Block kadagiti parke wenno pagliwliwaan, a mangitandudo iti aktibo a wagas ti panagbiag ken mangparnuay iti nair-irut a langenlangen kadagiti agindeg.

Iti pannakaisagana ti pannakaipakat ti Care Blocks, makium-uman ni Villar kadagiti healthcare providers, kadagiti edukador, ken kadagiti urban planners tapno adaptarenda dagiti naballigi a pagwadan a komunidad manipud kaagiti nadumaduma a paset ti lubong. Innayonna ketdi a nupay mabalin nga agbalin nga ubbog ti inspirasion dagitoy, ti kangrunaan a maaramid ket isu ti panangsukog kadagitoy a kapampanunotan tapno maisarmingna ti kultura a Filipino ken masungbatanna dagiti karit a sangsanguen ti pagilian.

Impeksa metten dagiti opisial lokal ti Las Piñas ti suportada para iti pamadasan a benneg daytoy a proyekto, ken adda metten panggep a maipakat daytoy a konsepto kadagiti probinsia nga agkurang kadagiti sentralisado a serbisio para iti salun-at, edukasion, ken pamastrekan.

Impaganetget ni Camille Villar a ti prinsipio iti babaen daytoy a gannuat ket isu ti panangbangon iti maysa a nasion nga addaan panangipateg iti amin, a mangipanamnama a dagiti tattao ken pamilia ket di rumbeng nga agpilida iti nagbaetan dagiti kangrunaan a kasapulan a kas iti pannakataripato ti salun-at, edukasion, wenno ti para iti aginaldaw a pagbiagda. Babaen ti pannakaibalay dagitoy a kasapulan iti maymaysa laeng a bubong, mas epektibo ti pannakapataray dagiti komunidad, ken awan ti maipapaigid a Filipino.

Sirsirmaten ni Villar ti Care Block Initiative a kas addang a mangbalbaliw iti pannakaipasdek dagiti komunidad ken iti panagrang-ay ti pagilian. Mamati nga iti pannakaestablisar dagiti natalged ken adda laeng iti asideg a lugar a pakaalaan kadagiti napateg a serbisio, mapatibker ti pundasion ti gimong. Babaen daytoy mapagtitipon a tignay, mangnamnama ni Villar a maparnuay ti nasalsalun-at ken naan-annayas ti panagkikinnayammetna a nasion a mangipatpateg iti pagsayaatan ti tunggal makipagili.