
Mamultanton iti aganay a kagudua a milion a pisos dagiti makunkuna a "nuisance candidate" wenno "para libeg a kandidato" kabayatan ti panawen ti eleksion.
Daytoy ti linaon ti House Bill (HB) No. 11317 a pinal nga inaprobaran ti Kamara idi Pebrero 3 babaen ti 193 a "yes" a botos kalpasan ti third and final reading daytoy bayat ti plenary session.
Napauluan ti gakat iti "An Act providing an additional ground for cancelling the certificate of candidacy of a candidate and making the acts of nuisance candidate an election offense."
Kinuna ni Deputy Speaker Cebu 5th district Rep. Vicent Franco "Duke" Frasco, ti nagpaay a presiding officer, nga uppat laeng a kameng ti Kamara ti nangbotos iti "no" iti gakat. Awan ti nag-abstain.
Panggep ti gakat--a napagtipon nga HB No. 8415 ken HB No. 9676--nga amendaran ti Sections 69, 261 (CC) ken 264 ti Batas Pambansa Blg. 881, kas naamendaran, a pagaammo kas Omnibus Election Code of the Philippines.
Yetnag ti nasao a gakat ti pannakadusa babaen ti panagmulta iti lima gasut a ribu a pisos (PhP500,000) iti asino man a maduktalan a nagbasol iti ania man a paglabsingan iti eleksion a naibinsabinsa iti gakat.
Panggep ti gakat a pagtalinaeden ti integridad ti electoral process babaen ti panangipaayna iti nayon a pangibatayan iti pannakakanselar ti certificate of candidacy (COC) ti maysa a kandidato ken panangipakat iti naing-inget a dusa kadagiti maiparit nga aramid ti maysa a kandidato.
Iti babaen ti HB No.11317, ti depinasion ti "nuisance candidate" ket pakairamanan dagiti nangipila iti COC nga addaan panggep a para iti kuarta, ganansia, wenno ania man a sabali pay a konsiderasion.
Mainayon dagiti sumaganad iti listaan dagiti maiparit nga aramid dagiti kandidato iti kandidatura ken kampania:
a) Panangirubo iti proseso ti eleksion iti pannakauyaw wenno pakadadaelan ti dayawna;
b) Malisioso wenno inggagara a pananggubuay iti pannakatikaw kadagiti botante babaen ti panagpapada ti nagnagan;
c) Panaggun-od ti kuarta, ganansia, wenno ania man a sabali pay a konsiderasion; ken
d) Panangisayangkat iti ania man nga aramid a mangipakita nga awanan iti bona fide wenno napudno a panggep ti kandidato nga agkandidato (tumaray para iti pagtakeman). (Ellson Quismorio/Manila Bulletin)