Impasigurado ti Department of Health (DOH) nga adda umdas a pondo ti Philippine Health Insurance Corporation (PhilHealth) tapno maipaayna dagiti benepisio para iti salun-at ti amin a Filipino iti 2025, nupay inamendaran ti Kongreso ti Universal Health Care (UHC) Act.
Segun ken ni Ted Herbosa, Sekretario ti DOH, napigsa latta ti pinansial a kasasaad ti PhilHealth ta addaan daytoy iti badiet a PhP284 a bilion para ita a tawen.
Nairaman iti badiet ti 10 a porsiento a nainayon a benepisio, nangatngato a case rates kadagiti kadawyan a maus-usar a benepisio kas iti Community-Acquired Pneumonia, Hypertension, ken Animal Bites.
Kinuna ni Herbosa a ti pannakayakar ti pondo ti PHilHealth ti nangpasubli iti isyu ti UHC, ta iti nabayag a panawen, nagtalinaed iti banko ti pondo ti PhilHealth, ket saan a maus-usar dagiti gagangay a Filipino. (Jel Santos/Manila Bulletin///Lito Hilidon/Bannawag)