Angayen ti Korte Suprema ita nga aldaw, Peb. 4, ti oral arguments mainaig iti tallo a petision a nangsupiat iti pannakayakar ti PhP89.9 a bilion a nasurok a pondo ti Philippine Health Insurance Corporation (PhilHealth) iti National Treasury.
Sinupiat da Senador Aquilino Pimentel III, Bayan Muna Chairperson Neri Colmenares, ken 1SAMBAYAN Coalition ti pannakayakar ti pondo ti PhilHealth iti national treasury, ket dimmatagda iti Korte Suprema, a kaduada dagiti kameng ti University of the Philippines Law Class 1975, Senior for Seniors Association, Inc., Kidney Foundation of the Philippines, ken dadduma pay a pribado a tao.
Nainaganan a respondent iti nasao a petision ti Sekretario ti Department of Finance (DOF) a ni Ralph G. Recto, House Speaker Ferdinand Martin Romualdez, Senate President Francis Chiz Escudero; Executive Secretary Lucas P. Bersamin; ken ti Presidente ti PhilHealth a ni Emmanuel Ledesma Jr.
Idi Okt. 29, nangipaulog ti SC iti temporary restraining order (TRO) a manglapped koma iti pannakayakar ti pondo ti PhilHealth, ngem sakbay a nairuar ti TRO, nayakaren ti PhP60-bilion a pondo ti PhilHealth iti national treasury -- PhP20 a bilion ti nayakar idi Mayo 10, PhP10 a bilion idi Agosto 21, ken PhP30 a bilion idi Okt. 16.
Vince Dizon, baro a daulo ti DOTr
Dinakamat dagiti nagpetision ti Article VI, Section 25 (5) ti Konstitusion nga agkunkuna a di mapalubosan ti ania man a pannakayakar ti pondo ken ania man a paset ti general appropriations law, malaksid no palubosan ti Presidente, Senate President, Speaker of the House, ti Chief Justice, ken dagiti daulo ti Constitutional Commission, babaen ti bileg ti linteg.
Kiniddaw ti Office of the Solicitor General (OSG) iti SC a waswasenna koma ti petision tangay ti pannakayakar ti pondo ti PHilHealth ket saan a makalapped wenno mangdadael iti pannakaipatungpal dagiti pagrebbengan ti PhilHealth. (Rey G. Panaligan/Manila Bulletin//Lito Hilidon/Bannawag)
