Pinasingkedan manen ni Camille Villar, maysa a family rights advocate, ti panangsuportana kadagiti polisia a mangsalaknib kadagiti pamilia a Filipino ken iti aglawlaw iti panangipaganetgetna a masapul ti balanse a wagas iti panangipasigurado iti kinasalun-at ken kinarang-ay ti agdama ken masakbayan a kaputotan (henerasion).
Itay nabiit pay a panagsaona, impaganetget ni Villar ti dakkel a pakainaigan ti pagimbagan ti pamilia ken ti panangaywan iti ekolohia babaen ti panangdakamatna a ti nasalun-at a planeta, mangrugi kadagiti babassit, tignay nga inlungalong ti komunidad a sangsangkamaysa nga agturong iti dakkel ken manayon a panagbalbaliw.
Ar-arapaapen ni Villar ti Filipinas a dagiti pamilia, agbiagda iti nalanglangto ken nataltalged a komunidad. Impaganetgetna ti kinapateg ti panagbangon kadagiti parke ken paglinglingayan a mangparegta iti panagay-ayam ken dekalidad nga oras, tapno makapalangen dagiti nagannak ken dagiti annakda iti maysa a kasasaad a manggutigot met iti panangipategda iti nakaparsuaan.
Tapno maragpat daytoy, kuna ni Villar a makikammayet kadagiti lokal nga autoridad, urban planner, ken eksperto iti aglawlaw, a mangitantandudo iti pannakaiballaballaet ti ad-adu pay a kayo, hardin, ken eco-friendly wenno dagiti saan a makadadael iti aglawlaw a pasdek, kadagiti lugar a pagnanaedan ti tao.
Impeachment complaint kontra ken ni VP Sara Duterte, addan iti Senado
Nayon pay ti plano ni Villar ti pannakaipatungpal dagiti naing-inget pay a pagannurotan iti pannakatarawidwid ti basura ken dagiti plastik a maminsan laeng ti pannakausarna iti panggep a mangkissay iti polusion a mamagpeggad nga agpadpada iti salun-at ti publiko ken dagiti natural habitat.
Iti benneg ti pagtaengan, al-allukoyen ni Villar dagiti pamilia a mangsurot kadagiti praktikal ken makasustener nga aramid—kas iti panag-compost, panag-recycle, ken panagmula kadagiti nateng iti hardin—a makatulong a mangkissay iti gasto, ken maisuro pay kadagiti ubbing ti kinapateg ti panangilala/panagin-inut ken responsibilidad. Patienna a babaen ti edukasion ken sangsangkamaysa a panagtignay, addaan dagiti pamilia iti bileg a mangmuli iti kababalin maipapan iti panangsalaknib iti aglawlaw ken panangsalaknib iti biodiversity ti pagilian.
Ikamkampania met ni Villar dagiti gannuat a mangted iti insentibo kadagiti green business wenno dagiti negosio a mangisaysayangat kadagiti wagas tapno maikabassit dagiti dakes nga epektona iti nakaparsuaan, dagiti mangsupsuportar iti nadalus nga enerhia, ken dagiti gannuat a mangpasayaat iti panagsagana kadagiti peggad nga adda pakainaiganna iti klima.
Kunana a dagiti nadakamat nga addang saan laeng a pagnumaran dagiti pamilia iti agdama no di pay ket dagiti sumarsaruno a kaputotan a maikari a mangtawid iti Filipinas a nabaknang iti natural a kinapintas ken rekursos. Babaen ti panangipamaysana iti pamilia ken aglawlaw, agtultuloy ti panangraat ni Camille Villar iti dalan nga agturong iti natibker, naranga ken napnuan biag a masakbayan ti tunggal Filipino.
