Awan blog wenno vlog a mamagbalin iti maysa a social media personality a kas pudpudno a periodista (journalist).
Daytoy ti impalgak ni co-founder ti Vera Files Ellen Tordesillas a nagpaay a resource person iti naangay a bista ti Tri-committee (tri-comm) ti Kamara itay Peb. 4 mainaig iti panagraira ti fakenews ken disinformation iti internet.
Kas maysa a beterana a periodista ken news fact-checker, imbinglay ni Tordesillas ti kapanunotanna iti nagdumaan ti blogger ken ti pudpudno a periodista.
Segun ken ni Tordesillas, adda periodista nga agbla-blog, ngem ti panag-blog ket saan a mamagbalin kenka a maysa a periodista, ta adda sursuroten dagiti periodista a code of ethics ken ti prinsipio ti kinapudno ken kinapatas.
Innayon ni Tordesillas a rumbeng a maaddaan met iti code of conduct dagiti social media vlogger tapno adda umno a pagbatayan dagiti agusar iti social media a kas iti panag-vlog wenno panag-blog.
Agdagup iti 41 a vlogger ken social media personalities ti inawis ti Tri-comm, ngem tallo laeng ti dimmar-ay.
Adu kadakuada ti nagkedked a makipaset iti bista, ngem nangipatulodda ketdi iti suratda iti Tri-comm, ken dimmatagda iti Korte Suprema tapno kuestionarenda ti legalidad ti bista nga inwayat ti nasao a komite. (Ellson Quismorio/Manila Bulletin/Lito Hilidon/Bannawag)