Saan a dinakamat ti Senado ti impeachment complaint maibusor ken ni Bise Presidente Sara Duterte sakbay nga agleppas ti sesionda itay Peb. 5.
Inawat ni Sekretario ti Senado Renato Bantug ti Articles of Impeachment ni BP Duterte iti malem ngem saan a naipakaammo iti plenario sakbay a nalpas ti sesion.
Kinuna ni Minority Leader Senador Aquilino “Koko” Pimentel III, impakaammo koma ni Bantug bayat ti sesion a naawaten ti Senado ti Articles of Impeachment ni BP DUterte.
Gapu itoy, posible a dakamaten ti Senado ti impeachment ni Duterte inton Hunio, wenno kalpasan ti panagbobotos inton Mayo, idinto nga agsubli ti sesion inton Hunio 2.
Polis a wanted iti panagrames, natiliw kalpasan ti ilalasatna iti EDSA busway
Ngem kinuna ni Pimentel nga adda pay posibilidad a tamingen ti Senado ti impeachment complaint bayat a naka-recess ti Senado, no kayat dagiti Senador nga ilaksid pay laeng ti pagannurotan ti Senado.
Impaulog ti Kamara ti impeachment ni Duterte babaen ti pananganamong ti 215 a diputado iti maikapat nga impeachment complaint nga impila ni Diputado Sandro Marcos itay Peb. 5.
Iti maysa nga interbiu, inlawlawag ni Bantug a naituding nga annongenna ti panangawatna iti verified complaint ken dagiti nairaman a dokumento, ngem masapul a tingitingenna pay dagiti dokumento ken mangaramid iti kompleto report nga itedna iti Senate President, ken kadagiti amin a kameng Senado.
Gapu iti daytoy, saan a nadakamat ti Articles of Impeachment iti plenario a sesion. (Hannah L. Torregoza/Manila Bulletin//Lito Hilidon/Bannawag)
