Indauluan ni Party-list Coalition Foundation Inc. (PCFI) President ken Ako-Bicol Party-list Rep. Zaldy Co dagiti 25 pay a kameng ti Kamara a kayatda a mainayon ti naganda kadagiti 215 a nagpirma iti impeachment complaint kontra ken ni Vice President Sara Duterte.
Kinuna ni House Secretary General Reginald Velasco iti maysa nga statement idi Biernes, Pebrero 7, a nangisumiter dagiti 25 a diputado iti verification forms-da kas complainants para iti pannaka-impeach ni Duterte.
Naipatuloden iti Senado ti maikapat nga impeachment complaint kontra iti bise presidente--a pinirmaan ti 215 a diputado--tapno aggunay ti Senado a mangbukel iti maysa a quasi-judicial impeachment court a mangtaming iti complaint.
Segun ken ni Velasco, saan a pisikal a nakaatendar dagiti 25 a diputado kabayatan ti oath-taking ken beripikasion para iti impeachment proceedings gapu iti nadumaduma a nakaikumitanda iti ballasiw-taaw wenno kadagiti bukodda a distrito.
Nupay kasta, impatulodda dagiti bukodda a beripikasion iti Kamara tapno mapormalisar ti suportada iti impeachment proceedings.
Pannakaiparang dagiti dokumento iti banko, buis, ken AMLC ni VP Duterte, inanamongan ti impeachment court ti Senado
Malaksid ken ni Co, dagiti 25 a nainayon a complainant ket dagiti kameng ti Lakas-CMD Party a da Biñan Rep. Marlyn “Len” Alonte, Cagayan Rep. Ramon Nolasco Jr., Isabela Rep. Tonypet Albano, ken Lanao del Norte Rep. Mohamad Khalid Dimaporo; ken da Leyte Rep. Carl Nicolas Cari, Masbate Reps. Richard Kho, Olga “Ara” Kho, ken Wilton Kho; Negros Occidental Rep. Emilio Bernardino Yulo, Quirino Rep. Midy Cua, Sultan Kudarat Rep. Prinsesa Rihan Sakaluran, ken Pangasinan Rep. Ramon Guico Jr. (Ellson Quismorio/Manila Bulletin)
