Saan a mariribukan ni Bise Presidente (BP) Sara Duterte iti tignay ti Kamara a nangipaulog iti impeachment kontra kenkuana ket agsagsaganan dagiti abogadona para iti panangbista ti Senado iti nasao nga impeachment complaint.
Daytoy ti kinuna ni BP Duterte kalpasan a pinirmaan dagiti 215 a diputado ti maikapat nga impeachment complaint a naglaon iti innem nga Articles of Impeachment itay Peb. 5.
Iti press conference nga inangay ni BP Duterte ita nga aldaw, Peb. 7, kinunana nga ispalen koma ti Dios ti Filipinas, gapu ta nabaybay-anen ti pagilian, ket awan ti umdas a kuarta dagiti tao a para iti taraon, balay, koriente, danum, ken edukasion.
Segun ken ni Duterte, adayo iti panunotna ti panaglusulos iti akemna.
Polis a wanted iti panagrames, natiliw kalpasan ti ilalasatna iti EDSA busway
Kinuna ni Duterte nga idi pay la 2023 a nagsagana dagiti abogadona para iti impeachment.
Saan nga imbutaktak ni Duterte no asino dagiti abogadona, ngem saanna a palubosan ti amana a ni dati a presidente Rodrigo Duterte a mangdepensa kenkuana ta lakayen daytoy.
Kinuna ni Duterte a nabasan dagiti abogadona ti impeachment complaint, agraman ti maipagarup a panangipangtana a mangpapatay ken ni Presidente Marcos, banag nga inlibak ni Duterte.
Innayon ni Duterte a dinanto dar-ayan ti impeachment trial ta amangan no mapabutnganda iti kaaddana, ngem inlawlawagna a saan a nasakit ti nakemna kadagiti diputado a nagpirma iti impeachment complaint. (Argyll Cyrus Geducos/Manila Bulletin//Lito Hilidon/Bannawag)
