Kinondenar ti Partido Demokratiko Pilipino-Lakas ng Bayan (PDP-Laban) ita nga aldaw, Peb. 7, ti impaulog ti impaulog ti Kamara impeachment complaint a maibusor ken ni Bise Presidente Sara Z. Duterte.
Inawagan ti dati a partido ti administrasion daytoy a "panagpammarang ken dinadarasudos a proseso a tinignay ti napolitikaan a motibo."
Inyebkas ni dati a presidente Rodrigo Duterte, daulo ti PDP-Laban, ti rurodna iti kaso ti impeachment a naipaulog iti nakurang a kagudua ti innem a tawen a termino ni Bise Presidente Duterte.
Segun iti PDP-Laban, ti impeachment ket nalawag a panangipakita iti narugit a politika, pananglais iti pagayatan dagiti Filipino, ken di nainsiriban a panangabuso iti bileg.
Polis a wanted iti panagrames, natiliw kalpasan ti ilalasatna iti EDSA busway
Kinuna ti PDP-Laban nga inggay-at dagiti dadduma a kameng ti Kamara ti impeachment tapno maibaw-ing ti atension ti publiko iti kumarkaro a kasasaad ti pagilian, agraman ti panagkunniber ken kinapanglaw, ken nairanta a mangdadael iti gundaway ni BP Duterte nga agkandidato para iti nangatngato a posision inton 2028.
Dinagadag ti PDP-Laban kadagiti Filipino a botante a panunotenda a nalaing no asino ti pilienda inton panagbobotos, kangrunaan kadagiti agbalin a Senador a mangikeddeng iti gasat ti Bise Presidente.
Kinuna ti PDP-Laban a "pinnaaduan" ti laban iti impeachment, ket no ad-adu ti kakadua ni BP Duterte iti Senado, nasaysayaat para iti pagilian.
Impasingked ni Mayor ti Davao City Sebastian Duterte, PDP-Laban Executive Vice President, a ti panangibotos kadagiti kandidatoda ket maysa a panagtakder a maibusor iti administrasion ni Marcos nga awan ti naaramidanna no di mangallilaw ken mangirurumen iti pagilian ken kadagiti umili. (Ivy Tejano/Manila Bulletin//Lito Hilidon/Bannawag)
