Binabalaw dagiti mannalon ken gunglo dagiti mannalon ti desision ti Department of Agriculture (DA) nga agangkat iti sibuyas, ket impakdaarda a maapektaran dagiti lokal a mannalon ta panagaapiten iti sibuyas.
Itay Peb. 6, kinompirmar ni Sekretario ti DA Francisco Tiu Laurel Jr. a naaprobaran ti importasion ti 3,000 a tonelada metrika a nalabaga a sibuyas ken 1,000 a tonelada metrika a puraw a sibuyas, ket manamnama a sumangpet ti kargamento iti las-ud ti dua a lawas.
Kinuna ni Leonardo Q. Montemayor, dati a sekretario ti DA, a biddut ti tiempo ti panagangkat ti DA ta nangrugin ti panagapit kadagiti lugar a kangrunaan a mangpatpatud iti sibuyas kas iti Bayambang iti Pangasinan, San Jose iti Occidental Mindoro, ken Bongabon ken Laur iti Nueva Ecija.
Impakdaarna a ti panagadu ti imported a sibuyas ti mangpababa iti presio iti farmgate, a mangpakaro iti kasasaad dagiti lokal a mannalon a marigrigatanen iti kinangina dagiti mausar iti agrikultura ken panangpeste dagiti harabas.
Polis a wanted iti panagrames, natiliw kalpasan ti ilalasatna iti EDSA busway
Segun ken ni Montemayor, awan ti naaramid a konsultasion kadagiti mannalon ken kadagiti gungloda sakbay a nagdesision ti DA nga agangkat iti sibuyas.
Kinondenar ti Samahang Industriya ng Agrikultura (SINAG) daytoy a desision ti DA, ken ti dinadarasudos a pannakaanamong ti panagangkat iti sibuyas uray madaman ti panagapit.
Impakdaar ni Executive Director ti SINAG Jayson Cainglet a gapu iti amak dagiti mannalon a lumaka manen ti sibuyas, adu kadakuada ti kapilitan a nasapa a mangapit iti mulada.
Kinuna ti SINAG nga ania man a deklarasion ti DA nga agkurang a suplay ket gagangay a mangiparipirip kadagiti agpakiaw nga ipanginada ti presio -- ket agpada a naabak ti mannalon ken konsiumer. (Jel Santos/Manila Bulletin//Lito Hilidon/Bannawag)
