Impalgak ti Gobernador ti Sulu a ni Abdusakur "Sakur" Mahail Tan itay Peb. 5 a 90 a porsiento dagiti umili ti Sulu ti dida kayat ti agsubli iti Bangsamoro Autonomous Region of Muslim Mindanao's (BARMM).
Iti naangay a bista wenno panagdengngeg ti Committee on Local Government ti Senado, kinuna ni Tan nga aglusulos no adda 20 a porsiento nga umanamong iti pannakaisublida iti BARMM, ta saanda a kayat ti agbalin a kameng ti ania man a rehion, no di ket ti laeng national government ti kayatda a pagkamengan.
Indauluan ni Senador Joseph Victor "JV" Ejercito ti nasao a komite a nangtaming iti singasing ni Sen. Juan Miguel "Migz" Zubiri a mairaman ti Probinsia ti Sulu iti BARMM.
Idi Septiembre 2024, inkeddeng ti Korte Suprema a saan a paset ti BARMM ti Sulu ta sinupiat dagiti umili ti ratipikasion ti Bangsamoro Organic Law iti naangay a plebisito.
China, inlibakna a nagkiddaw ni Duterte iti asylum
Kinuna ni Tan a nasaysayaat para kadakuada no mapalubosanda a mangparang-ay kadagiti umilida ken iti probinsiada tapno maipadada kadagiti dadduma wenno nasaysayaat pay.
Innayon ni Tan a saanda a kayat a dagiti saan a taga-Sulu ti mangikeddeng iti ania man a para iti pagimbaganda.
Inyebkas ti Office of the Presidential Adviser on Peace, Reconciliation and Unity (OPAPRU) ti panangsuportarda iti singasing ni Zubiri, ket patienda a ti pannakairaman ti Sulu iti BARMM ti mangipaay gundaway iti probinsia nga agnumar iti kapia, programa, ken paglintegan nga itukon ti BARMM.
Ngem kinuna ni Tan a no maaramid ti plebisito, kayatna a mairaman amin a probinsia tapno adda baro a mandato. (Dhel Nazario/Manila Bulletin//Lito Hilidon/Bannawag)
