Imballaag dagiti consumer group ken dagiti geopolitical expert a ti singasing a gakat nga agpanggep a mangpasayaat iti digital connectivity iti Filipinas, mabalin a pakaigapuan ti pannakapaadda dagiti ganggannaet nga espia a mangbiang iti Filipinas malaksid pay ti pannakapataud dagiti cyber attacks, ken yaadu dagiti sindikato dagiti scammer gapu kadagiti mapagduaduaan a probision ti gakat.
Iti maysa a pakaammo, kinuna ni Stratbase Institute president Dindo Manhit a ti gakat, wenno ti singasing a Konektadong Pinoy Act, ket addaan kadagiti probision iti deregulasion ti radio frequency spectrum nga inladawanna a kas kritikal a probision a posible a mamagbalin iti digital infrastructure a nalaka a mastrek dagiti malisioso a tattao.
“Kayatmi nga agkokonektartayo amin babaen ti internet ngem saan koma a maigasanggasat ti seguridadtayo. Ti pannakaikkat ti rekisito para iti pannakaipaay ti prangkisa nga ited ti Kongreso kadagiti tattao wenno kompania a mangipatakder iti digital nga impraestruktura ket luktanna ti ridaw para kadagiti ganggannaet nga entidad nga addaan kadagiti malisioso a panggep,” kinuna ni Manhit.
Inlawlawagna dagiti digital network ti pagilian ket masapul a masalakniban babaen dagiti natibker nga annuroten ken teknolohia a makabael a mangsalaknib kadagiti institusion ti turay ken pribado manipud kadagiti mannakibiang a ganggannaet.
16 nga OFW a nagrali iti Qatar, mabalin a maibalud iti 3 a tawen
Ngem iti pannakapalukay kadagiti kasapulan wenno rekisito para iti iseserrek dagiti baro a kompania ti telekomunikasion, kinuna ni Manhit a babaen daytoy baro a linteg, mabalin a makastrek dagiti di mapagtalkan nga entidad a mangriribuk iti impraestruktura ti telekomunikasion.
Innayonna a saan a mayannurot daytoy a gakat kadagiti pannalaknib a kas nadakamat iti Public Services Act (PSA), a mangipasigurado a dagiti napapateg nga impraestruktura ket agtalinaedda iti nainget a pannakasiput.
“Masapul a pabilegentayo ti kinatalged ti sektor ti telekomunikasiontayo, a saan ket a labusantayo para kadagiti ditay ammo no mapagtalkan wenno saan a ganggannaet nga entidad,” kinuna ni Manhit.
Sakbayna, impakaammo ni Presidente Marcos a nasken koma a mataming a dagus ti Senate Bill 2699 nga agpanggep a mamagbalin a moderno iti impraestruktura ti data transmission. Nupay kasta, imballaag dagiti eksperto nga iti pannakapalukay ti regulasion iti panagipasdek iti impraestruktura ti telekomunikasion, pagpeggadenna met ti seguridad wenno kinatalged ti pagilian.
Malaksid kadagiti peggad a pakaipasanguan ti pagilian, imballaag met ni consumer protection advocate Patrick Climaco, Secretary General ti Konsyumer at Mamamayan (KM) a babaen ti Konektadong Pinoy Bill, mabalin a nakarkaro pay ti panagsaknap dagiti digital fraud ken scam.
"No mapalubosan dagiti baro a kompania a sumrek iti industria ti telekomunikasion a dida aglasat iti nainget a pannakaamiris, mabalin a magamsaw ti sistema, a mangibunga iti ad-adda pay a yaadu dagiti online scam, dagiti phishing scheme, ken dagiti di mapagtalkan a serbisio iti telekomunikasion,” kinuna ni Climaco.
Iti sabali a bangir, kinuna ni CitizenWatch Philippines lead convenor Orlando Oxales a, “No saan a maipatungpal ti nainget a regulasion, makissayan met ti bileg ti National Telecommunications Commission (NTC) a mangsiput kadagiti baro a kompania a sumrek iti industria, a mangipalubos met kadagitoy a manggundaway kadagiti konsiumer, nangruna kadagiti agnaed kadagiti nalengleng a lugar (Geographically Isolated and Disadvantaged Areas wenno GIDA) a nakurang pay laeng ammoda iti lubong a digital—ket ngarud, dagitoy nga agus-usar iti internet kadagitoy a lugar ti nalaklaka nga agbalin a biktima dagiti malisioso a tattao.”
Iti sabali a pakaammo, impeksa ti Philippine Chamber of Telecommunications Operators (PCTO) ti nakaro a panangkontrada iti singasing a linteg. Kinunada a saan laeng nga awan mamaay ti gakat, mabalin pay a maikontra daytoy iti Konstitusion. Inrason ti grupo a ti panangikkat iti congressional franchise requirement para kadagiti baro a kompania a sumrek iti sektor ti telekomunikasion, pagbalinenna nga ang-angaw dagiti agdaman nga annuroten a nairanta a mangsalaknib iti limitado a radio spectrum ti pagilian.
“Pagbalinen ti Konektadong Pinoy Bill a nakakatkatawa dagiti probision ti Konstitusion, dina ikankano ti patas a kompetision, ken mabalin pay nga iraremna ti pannakapasayaat ti sektor ti telekomunikasion,” kinuna ti PCTO iti maysa a pakaammo. (Aaron Recuenco/ Manila Bulletin)
