Mangayab ni Presidente Ferdinand Marcos Jr. iti special session ti Senado tapno tamingenda ti impeachment ni Bise Presidente Sara Duterte, no kiddawen ti Senado daytoy.
Daytoy ti kinuna ni Presidente Marcos itay Peb. 6 idi nasaludsod no agpaayab met laeng ti special session para iti impeachment ti Bise Presidente, ngem inlawlawagna nga adda latta kadagiti Senador a mangikeddeng iti daytoy.
Itay Huebes, kinuna ni Senate President Francis Escudero a saan a tamingen ti Senado ti impeachment complaint bayat a naka-recess ti Kongreso agingga iti Hunio 2.
Kinuna ni Escudero a mabalin a tamingen ti Senado ti impeachment trial no mangayab ti Presidente iti special session. Ngem impaganetget ni Escudero a mabalin a mangayab ti Presidente iti special session, saan a tapno agpaay a kas impeachment court, no di ket tapno agpaay kadagiti napateg a banag ken singasing a linteg a masapul a maaprobaran.
Dip. Paolo Duterte, napalubosan nga agbiahe iti 17 a pagilian
Itay Peb. 5, impaulog ti Kamara ti impeachment complaint kontra ken ni BP Duterte babaen ti 215 a diputado a nagpirma iti impeachment complaint a naglaon iti innem nga Articles of Impeachment tapno maikkat ti Bise Presidente. (Betheena Unite/Manila Bulletin//Lito Hilidon/Bannawag)
