Binilin ti Philippine National Police (PNP) dagiti amin a police commander iti pagilian a pannakaipakat ti 24-oras a checkpoint ken pannakaisaad dagiti polis kadagiti "napeggad a lugar" ("high-risk areas") bayat nga umasideg ti panawen ti kampania para kadagiti national candidates ken party-list group inton Peb. 11.
Kinuna ni Gen. Rommel Francisco Marbil, hepe ti PNP, a ti pannakaipasdsek iti checkpoint ken pannakaisaad kadagiti polis ti mangnayon iti puersa a mangparmek kadagiti pribado nga armado a grupo, wanted a kriminal, ken di nairehistro a paltog.
Segun ken ni Marbil, sisasagana ti sibubukel a puersa ti PNP a mangsalangad iti ania man a gandat a mangpataud iti kinaranggas, panangbuteng kadagiti botante, wenno mangdadael iti proseso ti eleksion.
Kinuna ni Marbil a paset ti naing-inget a wagas ti seguridad ket paset ti komprehensibo a 100-aldaw a plano para iti midterm election inton Mayo 12, a nairanta a mangtaming kadagiti posible a pangta, mangrakrak kadagiti pribado nga armado a grupo, ken mangtaginayon iti urnos sakbay, kabayatan, ken kalpasan ti eleksion.
Polis a wanted iti panagrames, natiliw kalpasan ti ilalasatna iti EDSA busway
Dinagadag ni Marbil ti publiko nga aktibo a makipasetda iti gandat a mangsalaknib iti kintarnaw ti eleksion babaen ti panangipakaammoda kadagiti ania man a mapagduduaan nga aramid wenno mainaig-eleksion a kinaranggas babaen dagiti nairanta a hotline ken social media ti PNP. (Aaron Recuenco/Manila Bulletin//Lito Hilidon/Bannawag)
