Naipila iti Office of the Ombudsman (OMB) ti kaso a graft ken falsification of legislative documents maibusor ken ni House Speaker Martin Romualdez ken iti tallo pay a kameng ti Kamara, gapu iti maipagarup nga ilegal a pannakaisengngat ti PhP241 a bilion iti 2025 national budget.
Indatag da Diputado Pantaleon D. Alvarez (Davao del Norte 1st District), abogado a James Patrick Romero Bondoc ken Ferdinand S. Topacio, Diego L. Magpantay (Presidente ti Citizens Crime Watch), ken ni Ret. Gen. Virgilio R. Garcia ti darum ita nga aldaw, Peb. 10.
Malaksid ken ni Romualdez, nairaman a naidarum dagiti Diputado a da Manuel Jose Dalipe (Majority Leader), Elizaldy Co (dati a daulo ti Committee on Appropriations), ken Stella Luz Quimbo (agdama a daulo ti Committee on Appropriations).
Adda pay sabali a respondent a saan a ninaganan dagiti nagdarum.
Polis a wanted iti panagrames, natiliw kalpasan ti ilalasatna iti EDSA busway
Sangapulo ket dua a kaso a panaglabsing iti Artikulo 170 ti Revised Penal Code (RPC) wenno falsification of legislative documents ken 12 a kaso ti panaglabsing iti Section 3(e) ti Republic Act No. 3019 (Anti-Graft and Corrupt Practices Act), gapu kadagiti maipagarup a blangko a paset nga aggatad iti PhP241 a bilion iti 2025 General Appropriations Act (GAA).
Maibatay iti Article 170 ti RPC, madusa ti asino man nga opisial a mangpalsipikar iti legislative acts, resolutions, wenno official proceedings.
Segun ken ni Topacio, saan a mabalin nga ipambar dagiti naidarum a "typographical errors" laeng dagitoy nga inatur ti technical working group, ta nakadakdakkel a gatad daytoy.
Inlibak ni Topacio a politika ti makaigapu iti panangidatagda iti kaso iti OMB. (Czarina Nicole Ong Ki/Manila Bulletin//Lito Hilidon/Bannawag)
