Kas maysa a puersa ti napudno a panagiwarnak a nakabael a nanglasat iti 125 a tawen a panagbalbaliw ti politikal a kasasaad iti Filipinas, isayangkat ti Manila Bulletin ita nga aldaw, Peb. 10 ti “Matalinong Boto 2025,” kas panangitandudona iti impormasion mainaig iti eleksion tapno matulongan nga agsagana dagiti Filipino nga agbotos inton Mayo 12.
Babaen ti "Matalinong Boto 2025: Balitang Tapat para sa Payapang Halalan" itandudo ti Manila Bulletin ti kinapudno, kappia, ken ti kinatarnaw ti maaramid a 2025 midterm election.
Agbatay ti “Matalinong Boto 2025” iti tallo nga "adigi" - 1. Kinapudno, saan a palso a damag; 2. Natalna nga eleksion, saan a naranggas; ken 3. Nadayaw a diskurso, saan a panangpadakes.
Makitinnulong ti Manila Bulletin kadagiti mapagtalkan nga organisasion kas kadagiti fact-checking bodies ken dagiti unibersidad iti panangidatagna iti umisu ken mapagtalkan nga impormasion kadagiti agbasbasa.
Polis a wanted iti panagrames, natiliw kalpasan ti ilalasatna iti EDSA busway
Iparang ti Manila Bulletin kadagiti agbasbasa dagiti pakasaritaan maipapan kadagiti gannuat ken programa babaen ti papel, online, ken social media platform, a makatulong kadagiti agbasbasa a maaddaan iti naan-anay a pannakaammo ken agbalin a nainsiriban ti pangngeddeng wenno panangpilida.
Nupay ti politikal a diskurso ket paset ti politikal a proseso, tumulong ti Manila Bulletin a mangiparang iti padamag a naisentro iti polisia nga addaan nauneg a panangamiris iti plataporma, singasing, wenno plano dagiti kandidato.
Aramaten ti Manila Bulletin ti social media platform-na tapno maisuro dagiti botante iti makadangran nga epekto ti panangpadakes, agraman ti kinapateg ti konstruktibo a debate. (Ellson Quismorio/Manila Bulletin//Lito Hilidon/Bannawag)
