Pinatalgedan ni Senate President Francis “Chiz” Escudero ita nga aldaw, Peb. 10, a "wet signature" amin dagiti 215 a pirma iti verified impeachment complaint kontra ken ni Bise Presidente (BP) Sara Duterte a naidatag iti Kamara ken Senado.
Segun ken ni Escudero, daytoy ti resulta kalpasan ti panangtingitingda iti 215 a pirma babaen ti visual perusal nga inusar ti Senado.
Nagpirma dagiti 215 a kameng ti Kamara iti maikapat nga impeachment complaint kontra ken ni BP Duterte iti maudi a sesion ti Kongreso para iti 2025 election.
Kinuna ni Escudero a masapul a naannad ti Senado iti panangtingitingda iti kinapudno dagiti pirma sakbay nga agtuloyda. Innayon ni Escudero a gumatgatang ti Senado iti Artificial Intelligence (AI) app a makabael a manglasin iti pirma nga insurat ti ima ken iti e-signature.
Polis a wanted iti panagrames, natiliw kalpasan ti ilalasatna iti EDSA busway
Kinuna ni Escudero a naikkanen iti kopia ti impeachment complaint dagiti amin a Senador ket naipaskil daytoy iti opisial a website ti Senado.
Impaganetget ni Escudero a saan nga agdardaras ti Senado iti panangtaming iti impeachment complaint ket kinunana a mabalin a maaramid ti impeachment trial iti maika-20 a Kongreso. (Hannah L. Torregonza/Manila Bulletin//Lito Hilidon/Bannawag)
