Naguummong ti ginasut a pasurot ni Bise Presidente (BP) Sara Duterte iti Freedom Park iti Roxas Ave., Davao City itay Peb. 9 para iti indignation rally ken panangsindi iti kandela a kas pangsupiatda iti impeachment complaint a naipila kontra iti Bise Presidente.
Nagkaykaysada a nangipukkaw iti “Protect VP Sara” ket impeksada ti pannakadismayada kadagiti mammanday-linteg a kimmanunong iti impeachment a naidatag maibusor iti Bise Presidente.
Indagadag ni Randy Usman, dati a deputy mayor a mangibagi iti tribu ti Maranao iti Davao City, kadagiti timmabuno a siguraduenda a dagiti diputado a nangsuportar iti impeachment ni Duterte ket awan ti manamnamada a botos kadagiti sumaruno nga eleksion.
Impaganetget ni Usman a masapul a yebkas dagiti Davaoeños ken dagiti Filipino ti riknada maipapan kadagiti nabiit pay a pasamak iti pagilian, nangruna iti pannakaidatag ti impeachment maibusor iti Bise Presidente.
Polis a wanted iti panagrames, natiliw kalpasan ti ilalasatna iti EDSA busway
Iggem dagiti raliyista dagiti slogan nga agkidkiddaw iti transparency, nabilbileg a panangituray, ken ti pannakasalaknib dagiti nailian a programa, agraman flood control, pagimbagan dagiti OFW, ken ti pannakaisubli ti pondo ti PhilHealth.
Inyebkas dagiti timmabuno ti pannakadismayada kadagiti nasurok a 200 a diputado nga immanamong iti impeachment, ket impaganetgetda ti mandato ni Duterte manipud iti 32 a milion a nangibotos kenkuana. (Ivy Tejano/Manila Bulletin//Lito Hilidon/Bannawag)
