NASKEN met ti umno a panagiduIin kadagiti kemikal (pestisidio ken erbisidio) nga us-usarentayo a pangsalaknib kadagiti mulatayo kontra kadagiti peste. Iti kasta, masaluadan ti salun-attayo, ti salun-at dagiti kameng ti pamiliatayo, ken ti aglawlaw.
Agyamantayo manen ken ni Noralyn Legaspi manipud iti Research Directorate ti Mariano Marcos State University, Siudad ti Batac kadagitoy a tips:
1. Panagidulin kadagiti produkto a pangsaluad kadagiti mula
AGRIKULTURA: Panagtaraken iti Kalding, Napintas Met a Panguartaan
· Idulin dagiti kemikal iti natalged a lugar. Saan met a basta asino ti makastrek wenno makaala kadagitoy.
· Siguraduen a ti pagidulinan ket adayo kadagiti lugar a mabalin a makontaminaran kangrunaanna dagiti paggapuan dagiti maipauneg a taraon.
· Siguraduen nga adda masindadaan nga emergency kit/facility a maaramat no bilang adda maibelleng a kemikal, adda mapasamak nga uram, wenno dadduma pay a kalamidad a pakaigapuan ti pannakaibelleng dagiti kemikal. Mangaramid iti simple a cabinet ket urnosen a nasayaat dagitoy iti uneg. Ammuen ken ilista dagiti idulin tapno ammo no ania dagitoy; iti kasta, alisto a sapulen no aramaten.
· Saan a yakar iti sabali a botelia dagiti kemikal ta mabalin a malipatantayo no ania ti naipalaon kadagiti botelia a mabalin a mangsabidong iti tao.
· Pagsisinaen dagiti kemikal. Ilasin dagiti namaga kadagiti likido.
· Mangaramid iti imbentario dagiti kemikal tapno maaramat sakbay nga ag-expire dagitoy. Iti imbentario, ilanad ti nagan ti kemikal, kaano a nagatang, ken kasano ti kaaduna agraman ti expiry date-na. Aramiden ti stock inventory sakbay ti panagmumula.
2. Panangimanehar kadagiti alikamen
* Manteneren a nasayaat dagiti ramit a maaramat kadagiti kemikal ken siguraduen nga adda iti nasayaat a kasasaad dagitoy. Siguraduen nga awan perdina sakbay nga aramaten. Siguraduen met a ti agaramat, ammona no kasano nga aramaten daytoy.
* Siguraduen a calibrated dagiti sprayer tapno apagisu ti kaadu ti maipasuyot kadagiti mula. No perdi daytoy, mabalin nga agresulta ti pannaka-overdose dagiti mula.
* Bugguan a nasayaat dagiti aramaten a pagnawnawan iti kemikal, sprayer, ken dadduma pay a ramit a maaramat, nangruna no maaramat iti sabali a kemikal.
* Saan met a bugguan iti uray sadino dagiti aramaten nga sprayer tapno maliklikan ti kontaminasion nangruna kadagiti waig wenno iti karayan.
* Ilasin met a labaan dagiti naaramat bayat ti panag-spray.
3. Panagibelleng kadagiti maaramat a pangsalaknib kadagiti mula ken dadduma pay a nakontaminaran a basura
· Saan nga uliten nga aramaten dagiti nagawangan a botelia. Siguraduen a maidulin iti natalged a lugar sakbay a maibasura dagitoy.
· Siguraduen a saan a maaramat a pagidulinan iti taraon. Uray kasano ti kinapintas ti galon wenno container no kemikal ti nagyan, saan a mabalin nga aramaten ta makadangran iti salun-at.
· Bugguan a nasayaat dagiti container, mamitlo a daras sakbay a maibelleng dagitoy.
· Saan met nga agaramat kadagiti expired wenno maiparit a kemikal a pangsalaknib kadagiti mula.
· Ibelleng a nasayaat dagiti maaramat a pagdalus kadagiti container a nagyanan ti naaramat a kemikal tapno saan a makadangran iti aglawlaw.—O
