Impaganetget ni Senador Mark Villar ti madagdagus a panagkasapulan iti ad-adu a panagpuonan iti impraestruktura ti agrikultura, nangruna dagiti cold storage facilities, tapno maparang-ay ti seguridad ti taraon ken maksayan ti pannakapukaw kalpasan ti panagani iti Filipinas. Kas sungbat iti panagngato ti presio ti taraon ken kaawan nasigo a pannakataming ti supply chain, itantandudo ni Villar dagiti polisia a mangpamoderno iti sektor ti agrikultura ti pagilian ken mangpabileg kadagiti mannalon a Filipino.
“Kas maysa a nasion nga agpannuray unay iti agrikultura, masapul a siguraduentayo nga addaan dagiti mannalontayo iti kasapulan nga impraestruktura tapno maidulin, maibiahe, ken mailakoda a sitatalged dagiti produktoda. Maysa a kritikal nga addang ti panagpuonan para kadagiti cold storage facilities para iti pannakakissay ti pannakasaysayang laeng ti taraon, pannakapatalged ti presio, ken pannakasigurado ti natalged a suplay ti taraon para kadagiti amin a Filipino,” kinuna ni Villar.
Panangpapigsa ti Agricultural Value Chain
Impaganetget ti senador a dagiti pukaw wenno pannakalugi kalpasan ti panagani ti mangbukel iti dakkel a porsiento ti pannakasayang ti taraon iti pagilian, nangruna kadagiti nalaka a madadael a tagilako kas kadagiti prutas, nateng, ikan, ken karne. Gapu iti di umdas a pagipempenan, masansan a maipasungalngal dagiti mannalon kadagiti limitado nga opsion, a kapilitan nga ilakoda laengen dagiti produktoda iti nababbaba a presio ngem ti agsagaba iti pinansial a pukaw gapu iti pannakadadael dagiti apitda.
Polis a wanted iti panagrames, natiliw kalpasan ti ilalasatna iti EDSA busway
Kabalinan ti impraestruktura ti cold storage a:
• Paatiddogen ti Shelf Life ken Kissayan ti Pannakadadael – Makatulong ti umno ti pannakakontrol ti temperaturana a pagipempenan ti mangpreserbar iti kalidad ti taraon ken manglapped iti pannakadadael ti produkto.
• Patalgeden ti Presio ti Taraon – Mabalin nga idulin dagiti mannalon dagiti produkto kabayatan ti peak harvest seasons ken in-inut nga iruar dagitoy, a manglapped iti panagbaliwbaliw ti presio.
• Papigsaen ti Seguridad ti Taraon – Ti panangsigurado iti natalged a suplay ti taraon iti sibubukel a tawen ket makatulong a mangikabassit kadagiti epekto ti panagbaliwbaliw ti klima, bagyo, ken dadduma pay a pannakasinga.
Panagtinnulong ti Publiko ken Pribado a Sektor para iti Modernisasion ti Agrikultura
Tapno mataming dagitoy a karit, igangganetget ni Villar ti natibtibker a panagtinnulong ti gobierno ken ti pribado a sektor para iti pannakapadur-as ti sustainable agricultural infrastructure. Isingasing ni Villae dagiti insentibo para kadagiti negosio nga agipuonan kadagiti pasilidad ti cold storage ken supply chain, kasta met pannakaingatngato ti mailatang a badiet para kadagiti farm-to-market road, pasayak, ken processing centers.
“Ti agrikultura ti duri ti ekonomiatayo. Babaen ti panangipangruna kadagiti panagpuonan iti cold storage, logistics, ken transportasion, maitandudotayo dagiti mannalontayo, masiguradotayo ti seguridad ti taraon, ken maipromot ti kinaandur ti ekonomia,” innayon ni Villar.
Ingunamgunam pay ti senador ti panagkasapulan kadagiti smart agriculture technologies ken renewable energy solutions para kadagiti off-grid farming communities, ken iti nasaysayaat a pinansial a suporta para kadagiti babassit a mannalon.
Kas paset ti panagkumitna para iti panagdur-as ti agrikultura, plano ni Villar ti mangyam-ammo kadagiti lehislatibo a panglakagan a mangpapardas iti panagdur-as ti impraestruktura ken mangipaay iti long-term a solusion kadagiti karit iti seguridad ti taraon iti pagilian.--O
