SIUDAD TI LAOAG — Pagaammo a napudno ti kaaduan nga Ilokano iti nagan a Marcos, ket ditoy a siudad ti Kailokuan a mismo ti nangrugian dagiti kandidato a para senador a yen-endorso ti administrasion ni Presidente Ferdinand R. Marcos Jr. a nagkampaniaan, idi Pebrero 11, iti Centennial Arena iti siudad, kabayatan ti umuna nga aldaw ti campaign period para iti 2025 mid-term elections.
Timmabuno a mismo ni Presidente Marcos tapno allukoyenna dagiti Ilokano a suportaranda dagiti 12 a kandidato ti Alyansa para sa Bagong Pilipinas a buklen da Vicente “Tito” Sotto III; dati a sekretario ti Departament of the Interior and Local Government (DILG) Benhur Abalos; da dati a senador Panfilo Lacson ken Manny Pacquiao; da Senador Pia Cayetano, Lito Lapid, Ramon “Bong” Revilla Jr., Francis Tolentino, Imee Marcos; Mayor ti Siudad ti Makati Abby Binay; Diputado ti Siudad ti Las Piñas Camille Villar; ken ni ACT-CIS Party-list Rep. Erwin Tulfo.
Iti panagbitlana, kinuna ni Tulfo nga adu ti "pakigubgubatan" ti pagilian a pakairamanan ti nangato a presio dagiti tagilako, kinaawan ti panggedan ken panagkurang ti panggedan, ken narikut a pannakagun-od kadagiti agas.
"No umanamongkayo, iti daytoy a Mayo, bay-anyo nga agbalinak a kaduayo iti daytoy a pannakigubat," kinunana.
Polis a wanted iti panagrames, natiliw kalpasan ti ilalasatna iti EDSA busway
Impannakkel ni Tulfo a napadasanna a mismo ti nangtaming iti sumagmamano kadagitoy a parikut iti dati a trabahona a kas sekretario ti Department of Social Welfare and Development (DSWD).
Inyarig met ni Villar ti kick off rally-da iti homecoming para kadagiti arapaap ti tignay a Bagong Pilipinas ni Presidente Marcos.
“Saan la a para kadagiti Ilokano ti arapaapna no di ket para iti amin a Filipino, ket dayta met ti panggep ti Alyansa,” kinunana.
Iti met bitla ni Lacson, intampokna ti segun kenkuana ket tallo a kasayaatan a kababalin dagiti Ilokano: “kinamanagsalimetmet, kinagaget, ken kinapudno (loyal)."
“Nasalimetmet ken nagaget ti Ilokano tapno masiguradona ti nasaysayaat a masakbayan dagiti annakna. Ken napudno ti Ilokano,” kinunana.
“No maikkanak iti gundaway nga agserbi, tulongak ni Presidente Marcos iti panangikagumaanna a mangipasigurado iti naraniag a masakbayan ti pagiliantayo ken kadagiti sumarsaruno a henerasion dagiti Filipino,” innayon ti dati a hepe ti Philippine National Police (PNP).
Inaklon met ni Binay, anak ni dati a bise presidente Jejomar Binay, ti ramutna nga Ilokano, iti panangtuntonna iti puon ti pamiliana iti probinsia ti Isabela ken iti Bacarra, Ilocos Norte.
“Annugotek a ti tatangko ket taga-Isabela. Idi agrikuskami iti Bacara, naammuak a dagiti Albano sadiay ket nagtaktake a mayor, adda pay dagiti Purugganan, kabagian ida ti lilangko iti pamilia ti tatangko,” kinunana.
"Adda met darak nga Ilokano uray one-fourth laeng siguro, wenno one-eight. Ngem gapu ta nadekket ti panagkakabagian dagiti Ilokano, isu nga annugotekon," kinuna ni Binay.
Pinadas met ni Abalos a danggayan dayta a gupit dagiti Ilokano ket iti bitlana, impalgakna a asidegen a makiasawa ti balasangna iti maysa nga Ilokano.
"Adda darami nga Ilokano, makiasawakami kadagiti Ilokano, sapay koma ta ayatendak met kas maysa nga Ilokano," kinunana.
"Ilokos, sapay koma ta amponenyo ti sibubukel a pamilia ti Alyansa," innayon ni Abalos.
Mapattapatta a 7,000 agingga iti 8,000 a tattao ti timmabuno para iti kickoff rally ti Alyansa. (Ellson Quismorio/MB)
