Sinango dagiti agngayangay a para senador a da Bam Aquino ken Kiko Pangilinan ti arigna ket taaw ti tattao iti Dasmariñas Arena iti Siudad ti Dasmariñas, Cavite. Iti nagbaetanda, adda ni dati a bise presidente Leni Robredo, a nangitag-ay kadagiti imada ket kiniddawna kadagiti mangsupsuportar kadakuada a maminsan pay, iwayatda ti kasla di mabalin a mapasamak: ti panangisubli kadagitoy dua iti laem ti Senado iti laksid a sangsanguenda ti napigsa a politikal a makinaria dagiti kandidato ti administrasion.
Idi 2022, immanamong ni Pangilinan a tumaray a kas bise presidente ni Robredo, idinto nga insanud met ni Aquino ti panggepna nga agsenador manen ket nagbalin a campaign manager ni Robredo. Ti simmaruno ket maysa a "historic pink campaign" a nangpunno iti tattao kadagiti stadium, arena, iti Macapagal Boulevard iti Pasay City, ken iti Ayala Avenue iti Makati City.
Nupay nagkurang dagidi a rali, agpada a manginanama da Aquino ken Pangilinan iti inawaganda iti “People’s Campaign,” maysa a tignay a maiwayat babaen ti purpuro a boluntarismo, para iti 2025 midterm elections.
Isu nga idi Pebrero 11, ti opisial a panangrugi ti panawen ti panagkampania, nagsasarak manen dagiti tallo iti nabaknang iti botos a probinsia ti Cavite, a namindua a nagsublianda idi 2022 a nangpadas a nangallukoy kadagiti 2.4 a milion a rehistrado a botante.
Polis a wanted iti panagrames, natiliw kalpasan ti ilalasatna iti EDSA busway
Idi immuli ni Robredo iti entablado, kasla 2022 manen ket pinasangbay ti natibong a palakpak.
Linagip ni Robredo dagiti makasair iti puso a paspasamak iti napalabas a tallo a tawen ken dinillawna dagiti isyu a mapaspasaran ita ti pagilian.
Ket bayat ti panangpadayawna ken ni Senador Risa Hontiveros iti ar-aramiden daytoy iti Senado, kiniddawna kadagiti mangsupsuportar kenkuana nga isublida da Aquino ken Pangilinan iti Senado.
"Saan kadi a nalaklaka ti pannakilaban no adda kaaliadona? Isu a ti sumaruno nga aramidentayo ket ti panangted ken ni Senador Risa kadagiti kaaliado ken partners-na, a kapadana a manakman ken nalalaing, a kaduana iti amin a pannakilaban,” innayon ni Robredo.
Tumaray a para mayor ti Naga City, patien ti dati a bise presidente a maikari a maisubli da Aquino ken Pangilinan iti Senado.
“Da Bam ken Kiko ti kapigsaan a pammaneknek a ti pudno a mangipatpateg ket saannaka nga allilawen, saannaka a baybay-an, ken saannaka a sanudan,” kinunana.
Kas nagpaay a senador, impannakkel ni Pangilinan ti saan pulos a nairaman ti naganna kadagiti anomalia, ta inkarina nga agserbi a napudno ken sipupudno.
Imbinglay met ni Aquino a maysa kadagiti rason a kayatna ti agsubli iti Senado ket tapno masigurado a nasayaat ti pannakaipatungpal ken pannakapondo ti linteg.
“Maysa a linteg a napateg unay, a masapul a salaknibantayo, kasapulan nga ilatangantayo iti pondo, kasapulan nga ikalawatayo ket ti linteg para iti libre a kolehio,” kinunana.
Iti Cavite, kinuna ti dati a senador a tultulongan ti nasao a linteg ti 80,000 nga estudiante, a ti kagudua kadagitoy ket nagturposen, ngem dinillawna ketdi ti ₱3 a bilion a budget cut iti 2025 national budget.
“Isuda dagiti ti resibok," kinuna ket intudona dagiti estudiante iti malikudanna. " Pammaneknek isuda a libre ti kolehio iti Filipinas."
“Isuda ti pammaneknek a no agserbi ti maysa a public servant, aramidenna ti umno, saan nga agtakaw, ken aramidenna no ania ti kasapulan ti pagilian, kabaelantayo ti agprogreso,” innayon ti dati a senador.
Kas kadagiti pink rallies idi 2022, nakaawis ti proclamation rally da Aquino ken Pangilinan kadagiti celebrties ken influencers.
Indauluan ti asawa ni Pangilinan a ni Megastar Sharon Cuneta-Pangilinan, adda iti nasao nga aktibidad ti TV host a ni Robi Domingo ken ti komediaante a ni Alex Calleja, kasta met ti aktres iti teatro ken TV a ni Pinky Amador.
Nag-perform met ti banda a Parokya ni Edgar babaen ti lima kadagiti kalatakan a kantada--“Para Sayo,” “Harana,” “Bagsakan,” “One and Only You,” ken “Halaga.” (Raymund Antonio/MANILA BULLETIN)
