Binabalaw da Diputado Pammy Zamora (Taguig 2nd District) ken Rodge Gutierrez (1-Rider Party-list) itay Peb. 11 ti pannakaidarum ni House Speaker Martin Romualdez iti maipagarup a kontrobersia iti 2025 General Appropriations Act (GAA).
Segun ken ni Zamora, awan ti legal wenno moral a karbengan ni Dip. Pantaleon Alvarez (Davao del Norte 1st District) a mangidatag iti kaso a panagkunniber kontra ken ni Romualdez ta saanna nga impalgak ti panangsupiat wenno alegasionna bayat ti pannakaaprobar ti national budget.
Ni Alvarez ti nangidaulo iti pannakaidarum ni Romualdez iti Office of the Ombudsman (OMB) iti kaso a falsification of legislative documents gapu iti maipagarup a panangisengngatda iti PhP124 a bilion iti blangko a paset ti nailian a badiet.
Kinuna ni Zamora a kas kameng ti Kamara, adda gundaway ni Alvarez a mangidatag kadagiti pakaseknanna idi pagsasaritaan ken naaprobaran ti nailian a badiet iti Kamara, ngem saanna met nga inaramid daytoy.
China, inlibakna a nagkiddaw ni Duterte iti asylum
Dinillaw ni Gutierrez ti tiempo ken lugar a panangidatag ni Alvarez iti reklamona, ket kinunana a no pudno a mainaig iti linteg ti parikutna, dimmatag koma ni Alvarez iti Korte Suprema.
Inimtuod da Zamora ken Gutierrez no apay a saan nga inraman ni Alvarez dagiti senador a kameng ti bicameral committee (bicam), nangruna ta saan met a paset ti bicam ni Romualdez.
Innayon ni Gutierrez a dakkel a saludsod no apay a dagiti laeng diputado ti indarum da Alvarez. (Joseph Pedrajas/Manila Bulletin//Lito Hilidon/Bannawag)
