Kaso a kriminal a kas iti inciting to sedition ken grave threats ti impila ti National Bureau of Investigation (NBI) ita nga aldaw, Peb. 12 maibusor ken ni Bise Presidente Sara Duterte gapu iti maipagarup a panangipangtana kada Presidente Ferdinand Marcos Jr., First Lady Liza Araneta Marcos, ken House Speaker Martin Romualdez.
Segun ken ni NBI Director Jaime B. Santiago, ti NBI ti nangidatag iti kaso nga inciting to sedition ken grave threats iti Department of Justice (DOJ).
Ti inciting to sedition ket ti di nainkalintegan nga aramid ti maysa a tao a, nupay awan ti direkta a pannakairamanna iti krimen a panagrebelde, sugsoganna ti dadduma nga agrebelde babaen dagiti bitla, proklamasion, sinurat, emblema, cartoon, bandera, wenno dadduma pay a ladawan a mangiturong iti panggep a panagrebelde, wenno ti aramid ti asino man a tao a mangisawang kadagiti managrebelde a sasao wenno palawag, agsurat wenno agipablaak wenno agiwaras kadagiti nakababain a panangpadakes iti gobierno wenno dagiti autoridad.
Iti sabali a bangir, ti grave threat, segun iti Article 282 ti Revised Penal Code (RPC) ket "maibilang a serioso a basol ta mairaman ti pangta a mangdangran iti biag, dayaw, wenno sanikua ti maysa a tao."
Polis a wanted iti panagrames, natiliw kalpasan ti ilalasatna iti EDSA busway
Inlawlawag ni Santiago nga amin a kaso nga ipila dagiti pannakabagi ti linteg ket masapul a maidatag iti opisina ti prosecutor.
Kinuna ni DOJ Prosecutor General Richard D. Fadullon nga adalenda manen ti reklamo tapno kitaenda no kompleto ti ebidensia.
Sakbay ti pannakaipila ti kaso, namindua nga inawis ti NBI ni BP Duterte tapno ilawlawagna ti alegasion kontra kenkuana, ngem nagkedked ni Duterte ti amin a summon-da.
Innayon ni Santiago a no nagparang koma ni Duterte kadagiti imbestigador, nasaludsodda koma kenkuana no asino ti baonenna a mangpapatay iti Presidente, iti First Lady, ken iti House Speaker. (Jeffrey Damicog/Manila Bulletin//Lito Hilidon/Bannawag)
