Ababa laeng ti sungbat ni Bise Presidente (BP) Sara Duterte iti rekomendasion ti National Bureau of Investigation’s (NBI) a pannakaipila ti kaso a sedition ken grave threats kontra kenkuana.
"Kas ninamnama," kinuna ti Office of the Vice President (OVP) kadagiti reporter ita nga aldaw, Peb. 12.
Inrekomendar ti NBI ita nga aldaw ti pannakaidarum ni BP Duterte iti kaso nga inciting to sedition ken grave threat gapu iti insawangna iti maysa a press conference nga addan kinasaritana a tao a mangpapatay kada Presidente Marcos, First Lady Liza Araneta-Marcos, ken House Speaker Martin Romualdez no bilang ta isu ti matay.
Maysa a kriminal a proseso daytoy, a mayawat iti maysa a prosecution team ti Department of Justice (DOJ), a mabalin a mangwaswas iti kaso wenno mang-subpoena iti Bise Presidente.
Dip. Paolo Duterte, napalubosan nga agbiahe iti 17 a pagilian
Iti maysa a press conference nga inangay ni BP Duterte idi Nobiembre ti napan a tawen, impeksana ti rurodna iti pamilia ti Presidente - iti asawana a ni Liza ken iti kasinsinna a House Speaker - kalpasan nga impupok ti House Committee on Good Government ni Undersecretary ti Office of the Vice President (OVP) Zuleika Lopez.
Maigapu daytoy iti panagimbestigar ti Kamara iti pannakausar ti confidential fund ti OVP ken ti Department of Education (DepEd) idi isu ti sekretaria.
Inaklon ni Lopez iti maysa a panangbista, a kiniddawna iti Commission on Audit (COA) a saanda koma a patgan ti subpoena iti audit report ti liquidation mainaig iti confidential fund ti OVP.
Idi napan a tawen, saan a nagparang ni BP Duterte idi kiniddawda a mangted iti salaysay maipapan iti imbagana iti press conference a naangay babaen ti Zoom. Ngem nangipatulod ketdi ni Duterte iti surat babaen dagiti abogadona ket impakaammona ti panagkedkedna iti awis ti NBI. (Raymund Antonio/Manila Bulletin//Lito Hilidon/Bannawag)
