Sangapulo ket walo (18) a tao ken institusion ti napadayawan iti Manila Bulletin Newsmaker Awards a naangay iti Manila Hotel Tent City itay Peb. 10, kas paset ti pannakarambak ti maika-125 a tawen ti Manila Bulletin.
Maikatlo a tawenen ti Newsmaker Awards a mangbigbig iti napateg a kontribusion dagiti tao ken/wenno grupo iti pannakatag-ay ni Filipino ken ti pagilian.
Napadayawan da Nesthy Petecio (ti umuna a Filipina a nangyalat iti Olympic medal iti boxing) ken Aira Villegas (Olympic bronze medalist); GoTyme Bank; ti grupo a BINI; BingoPlus; Mylo Speech Buddy (maysa nga app a nadisenio a mangtulong kadagiti ubbing nga addaan iti autismo ken speech delay); Kathryn Bernardo (Newsmaker awardee iti maikadua a daras); Alden Richards (maysa a kalaingan nga aktor iti henerasionna); Dr. Noel Peter Tan (gapu iti gapuananna iti plant-based ken biodegradable material); RLC Residences; ACEN; SM Foundation; Dr. Victor Erwin Jocson (maysa nga interventional radiologist a nangpaimbag iti 105 ti tawenna a pasiente); Kawayan Collective; HSBC Philippines; Alliance Global Group Inc.; ni two-time Olympic gold medalist Carlos Yulo; ken ni San Juan City Mayor Francis Zamora.
Iti daytoy a tawen, timmulong iti Manila Bulletin iti pannakaipaay ti Newsmaker Awards ti International Container Terminal Services, Inc. (ICTSI), Volvo, Medical City, BDO, ken DigiPlus. Da Manila Bulletin Executive Editor Ed Bartilad ken Pinky Colmenares, Jordan Tan (Business Development Manager), ken Herminio “Sonny” Coloma (Publisher) ti nangyawat iti tropeo kadagiti napadayawan.
Polis a wanted iti panagrames, natiliw kalpasan ti ilalasatna iti EDSA busway
Adda met iti seremonia ni First Lady Marie Louise Araneta-Marcos, ni Manila Bulletin Chairman Basilio C. Yap, ken ni Manila Bulletin Vice-Chairman and President Dr. Emilio C. Yap III. Dimmar-ay met dagiti nadumaduma a kameng ti diplomatic corps, opisial ti siudad, ken dadduma pay a kameng ti Manila Bulletin board.
Nabangon ti Manila Bulletin idi Peb. 2, 1900, ket maibilang a kabayaganen a pagiwarnak iti pagilian. Addaan metten daytoy iti multimedia platform. Ti met laeng Manila Bulletin ti mangipabpablaak iti Bannawag, ti kangrunaan a magasin dagiti Ilokano.
Ti Newsmaker Awards ti maysa a wagas ti Manila Bulletin a mangbigbig kadagiti tattao ken institusion nga agtultuloy a mangitagtag-ay iti puli a Filipino gapu kadagiti gapuananda. (Dom Galeon/Manila Bulletin//Lito Hilidon/Bannawag)
