SIUDAD TI TABUK, Kalinga – Agdagup iti 32 a tattao ti nadunor iti aksidente iti dyip a napasamak iti Barangay Balantoy, Balbalan, Kalinga, idi Martes, Peb. 11.
Kadagitoy a naaksidente, 26 ti estudiante iti hayskul manipud iti Saint Theresita’s School of Balbalan a mapan koma makisalip iti Bodong Drum and Lyre Competition ti 30th founding anniversary ti Kalinga ken iti 6th Bodong Festival itoy a siudad nga addaan iti tema a “Rooted in Culture, United in Progress: Lumin-awa Kalinga!”
Kinuna ni Police Col. James D. Mangili, Kalinga police chief, a sumagmamano kadagiti nadunor ti napagawiden manipud iti ospital idinto nga adda dua a nagsagrap iti dunor iti ulo ngem addan dagitoy iti natalged a kasasaad.
Walo kadagiti nadunor ti nainaganan a kas Jaamerhyn Wadwadan, 31; Dawaton Gevin, 16; Bryle Kent T. Balao-as, 16; Omar L. Tangdol, 16; Jayboy S. Gunday, 18; Shea Faye D. Mangayan, 14; Gelai L. Gragasin, ken Shanelle M. Magayam.
Maipadpadamag a 'kumaw' iti Nueva Vizcaya, 'fake news,' segun iti PNP
Maibatay iti report ti polisia, inrason ti drayber a ni Gerald S. Baydan, 51, a dina nakontrol ti dyip iti isasalog daytoy iti nagsikko a paset ti kalsada ket tapno dida agtartarus iti derraas, indungparna ti lugan iti bakras nga igid ti kalsada a nakaigapuan ti pannakapadata ti lugan.
Dagiti biktima ket paset ti convoy dagiti Kalinga Day participants ken Balbalan local government unit personnel nga agturong iti pakaangayan ti festival.
Mapalpalutpot pay laeng ti aksidente idinto nga adda ita ni Baydan iti kustodia ti polisia. (Freddie Lazaro/ Manila Bulletin)
