Binallaagan ti Commission on Elections (Comelec) dagiti kandidato iti panagraira ti scam a mabalin a maidiaya kadakuada sakbay ti panagbobotos inton Mayo 2025 a pakairamanan dagiti pre-shaded a balota nga addaan iti makunkuna a di makita wenno nalimed a marka.
Daytoy ti impakdaar ni George Erwin Garcia, Comelec Chairman, a panang-scam dagiti sindikato a mangbiktima kadagiti kandidato babaen ti panangikarida iti sigurado a panangabakda iti eleksion a kasukat ti dakkel a gatad ti kuarta.
Iti naangay a ballot verification ita nga aldaw, Peb. 13, iti Amoranto Stadium iti Siudad ti Quezon, kinuna ni Garcia a saan a pudno ti idiaya ti scammer ta imposible ti panangikabil kadagiti di makita wenno nalimed a marka iti balota, ken maysa a laeng daytoy a pangallilaw nga us-usaren dagiti sindikato tapno adda pagkuartaanda.
Kinuna ni Garcia a saan a kabaelan dagiti sindikato ti mangikabil iti di makita a marka kadagiti balota a yim-imprenta ti Comelec, ta malasin ti makina daytoy.
Polis a wanted iti panagrames, natiliw kalpasan ti ilalasatna iti EDSA busway
Innayon ni Garcia a maysa laeng daytoy a panangallilaw dagiti sindikato kadagiti kandidato wenno maysa nga aramid a mangdadael it proseso ti eleksion.
Inlawlawag ni Garcia a kalpasan a maimprenta dagiti balota, agdalan dagitoy iti manomano a pannakaberipikar tapno masigurado nga umisu ti kadakkel, maris, pannakaputed, ken dagiti nalimed a pasetda. Kalpasanna, agdalan iti pannakatingiting iti makina no mabigbig ken mabilang met laeng ti balota.
Iti agdama, addan 27 a milion a naimprenta a balota wenno 36 a porsiento ti dagup a bilang ti balota a masapul a maimprenta.
Kalpasan a maberipikar dagiti balota, maserraan dagitoy tapno masalakniban. Ket sakbay ti eleksion, maaramid ti final testing ken pannakaserra dagiti balota ken makina. (Dhel Nazario/Manila Bulletin//Lito Hilidon/Bannawag)
