Napapatay dagiti soldado ti nangato a daulo ti New People’s Army (NPA) a ni Myrna Sularte, alias Maria Malaya ken biuda daydi daulo ti NPA a ni Jorge "Ka Oris" Madlos, iti maysa nga engkuentro iti Barangay Pianing, Siudad ti Butuan iti Agusan del Norte itay Peb. 12.
Ni Madlos ti maysa kadagiti nabayagen a bantay ti komunista a tignay iti Mindanao ken napapatay iti pannakidangadang kadagiti puersa ti gobierno iti Bukidnon idi Oktubre 2021.
Kinompirma ni Capt. Jonel Castillo, pannakangiwat ti Army 901st Brigade a nakabase iti Placer, Surigao del Norte, a napapatay ni Sularte iti panagririnnupak.
Segun ken ni Castillo, ni Sularte ti sekretaria ti NPA-Northeastern Mindanao Regional Committee ken kameng ti political bureau ti Communist Party of the Philippines (CPP).
Kasano a maipaayantayo iti seguridad ni Dela Rosa no mapukpukaw met, kuna ti Palasio
Napapatay ni Sularte bayat ti pannakirinnupak ti bunggoyna kadagiti soldado a mangkamkamat kadakuada iti Sitio Imelda, Barangay Pianing.
Ti pannakatay ni Sularte ti maysa a dakkel a pukaw iti tignay dagiti rebelde iti Northeastern Mindanao ken awanen ti dadduma pay a nalatak a mangidaulo.
Tubo ti Bayugan City, Agusan del Sur ni Sularte ket maysa kadagiti "most wanted" a daulo ti NPA iti pagilian gapu iti adu a kaso a kriminal, agraman rebellion, murder, multiple murder, ken frustrated murder. (Keith Bacongco/Manila Bulletin//Lito Hilidon/Bannawag)
