Gapu iti umad-adu a naimpeksion, indagadag ti Department of Health (DOH) iti publiko itay Peb. 14 nga agannad iti kadagiti influenza-like illnesses (ILI), dengue, ken leptospirosis, a patauden ti agdama a kasasaad ti panawen.
Daytoy a yaadu ti bilang ket gapu iti masansan a panagtudo a yeg ti shear line, Intertropical Convergence Zone (ITCZ), ken easterlies a mangitunda iti pannakaiwaras ti sakit.
Maibatay iti datos ti DOH, bimmaba ti kaso ti ILI iti 50 a porsiento iti tunggal tawen -- manipud 21,340 a kaso idi 2024 ket nagbalin a 9,995 ita a tawen - ngem napardas ti panagadu ti bilangda kadagiti napalabas a lawas.
Segun iti DOH, manipud Enero 5 agingga 18, nagbalinen a 5,150 ti kaso ti ILI, doble ti 2,388 a kaso a nailanad manipud Dis. 22 agingga Enero 4.
Polis a wanted iti panagrames, natiliw kalpasan ti ilalasatna iti EDSA busway
Immadu met ti kaso ti dengue iti 40 a porsiento, a buklen ti 28,234 a kaso ti nailanad idi Peb. 1.
Manipud Enero 5 agingga 18, mapanen a 15,088 ti kaso ti dengue, a nangipakita iti walo a porsiento a yaadu manipud iti las-ud ti napalabas a dua a lawas.
Segun iti DOH, ngimmato met iti walo a porsiento ti kaso ti leptospirosis, a napanen iti 422 manipud 392 idi napan a tawen.
Imbalakad ni Sekretario ti DOH Teodoro “Ted” Herbosa iti publiko nga umuman a dagus iti doktor no makarikna iti ania man sintoma ti trangkaso, dengue, wenno Leptospirosis, kas iti gurigor, uyek, sore throat, pannakabannog, naut-ot iti bagi, ngesngesen, sakit ti ulo, wenno panagsarua. (Jel Santos/Manila Bulletin//Lito Hilidon/Bannawag)
