SIUDAD TI CANDON, Ilocos Sur – Tallo a tao ti natay ken innem ti nadunor iti aksidente a nakairamanan ti siam a lugan iti kalsada nasional iti Brgy. San Nicolas itoy a siudad idi malem-kalman ti Domingo, Pebrero 16.

Innaganan ni Police Master Sgt. Bryan A. Naungayan, Candon police duty investigator, dagiti natay a kas Dandilo Galigaro, pasahero ti Honda CRV; Rodrigo Callos, nangimaneho iti maysa a Rusi motorcycle; ken Claude Joshua, 28, nangimaneho iti maysa nga Skygo motorcycle.

Nainaganan met dagiti nadunor a kas Louie Garnace, 57, drayber ti Honda CRV; Rolando Madarang, 55,  nangimaneho iti maysa a Honda motorcycle; Expedito Olivo Angal 55, tricycle driver, ken ti pasaherona a Joshua Peralta, 24; Ronald Espanto, 32, nangimaneho iti maysa a motorsiklo; ken  Clavel Narbasa, 63, a magmagna idi iti kalsada.

Maibatay iti imbestigasion, naammuan a naawanan ni Garnace iti kontrol iti manmanehuenna a Honda CRV ket nadungparna dagiti motorsiklo a manmanehuen da Callos (a natay kalpasanna) ken Madarang (a nadunor).

Lokal

Maipadpadamag a 'kumaw' iti Nueva Vizcaya, 'fake news,' segun iti PNP

Nadungpar met ni motorsiklo ni Madarang ti traysikel a minaneho ni Roger Agonoy, a saan a nadangran.

Nagtuloy ti panagtaray ti Honda CRV ket nadungparna ti motorsiklo a manmanehuen ni Claude Joshua (a natay kalpasanna), ti traysikel ni Angal (nadunor), ti motorsiklo ni Espando (nadunor), ti Toyota Innova a manmanehuen ni Eirene Mary Jemina Valdez (saan a nadangran), ken maysa a nakaparada a lugan.

Siam a tao ti nadunor ken naitaray iti ospital a tallo kadagitoy ti naideklarar a natay gapu iti aksidente.

Natakuatan iti panagpalutpot a maatap a nakainum ni Garnace a drayber ti Honda CRV a nangigapu iti karambola dagiti lugan. (Freddie Lazaro/Manila Bulletin)