Insingasing ni Camille Villar ti pannakabukel ti inter-agency task force a mangtaming iti posible a pannakapukaw ti panggedan gapu iti napartak a panagsaknap ti panagusar ti Artificial Intelligence (AI) ken naparang-ay a teknolohia iti trabaho.
Iti sidong ti House Bill (HB) No. 11308, wenno Workers' Protection and Skills Development in the Digital Economy Act, impaganetget ni Villar ti kinapateg ti pannakaipasdek ti early warning system tapno maammuan dagiti industria a posible nga agusar iti AI ken dadduma pay a moderno a teknolohia iti panagnegosioda, a mabalin a mamagpeggad iti panggedan dagiti tao.
Maladingitan ni Camille iti nakaparpardas a panangbalbaliw ti teknolohia, a pakairamanan ti AI ken machine learning, iti lubong.
"Bayat a pumardas dagitoy a panagbalbaliw, agbaliw met ti masakbayan ti trabaho, ket napateg unay ti maaddaan iti kabaelan a sumrek iti baro a panggedan," kinunana.
Kas iti 'UniTeam,' ilunglungalong manen ni Marcos ti 'unity' dagiti lider tapno masolbar dagiti parikut ti Filipinas
Kinuna ni Villar a panggep ti naisingasing a linteg a "pasayaaten dagiti trabahador tapno maibagayda iti napardas a panagbalbaliw ti panawen. Ikagkagumaan daytoy a suportaran dagiti trabahador nga agpeggad gapu iti Artificial Intelligence wenno teknolohikal a panagrang-ay, mangitandudo iti panangpasayaat iti paglaingan, ken mangpalubos iti panagbalbaliw ti karerada iti digital nga ekonomia".
Kinuna ni Villar a ti National Task Force on Digital Economy Job Disruption a mabalin a buangayen iti babaen ti HBN 11308 ti mangipasdek iti early warning system a mangipaay iti datos a kasapulan ti gobierno tapno makapataudda iti pamuspusan a mangtaming iti panangsinga ti digital wenno AI.
Ti task force ti mangipasdek iti Workers’ Adjustment Program (WAP) a mangipaay iti pinansial a tulong, kas iti kompensasion wenno sueldo, unemployment benefits ken temporary income support, kadagiti naikkat iti trabahoda.
Daytoy nga inter-agency body ket buklen ti Department of Labor and Employment, Department of Information and Communications Technology (DICT), Department of Trade and Industry (DTI), ken ti Technical Education and Skills Development Authority (TESDA).
Malaksid iti pannakaipasdek ti early warning system ken ti WAP, ti task force ket mangbalabala ken mangipatungpal iti komprehensibo a programa ti upskilling ken reskilling a naipamaysa kadagiti digital a paglaingan ken dagiti tumpuar a teknolohia tapno matulongan dagiti trabahador a mangpasayaat wenno makagun-od kadagiti baro a paglaingan tapno mapennek dagiti kalikagum ti digital nga ekonomia.
Mangpataud met daytoy iti sistema ti panangsaranay iti panagbaliw ti karera tapno matulongan dagiti naikkat a trabahador nga agsapul iti baro a trabaho.
Impaganetget ni Villar a rebbengen ti gobierno ti "salakniban ti kalintegan dagiti mangmangged ken mangitandudo iti pagimbaganda".
"Agdadanggaytayo a mangtulong kadagiti kailiantayo nga apektaran ti panagdur-as ti kabaruan a teknolohia, ken iti panagusar iti AI kadagiti negosio iti pagiliantayo," kinuna ni Villar.
Pinattapatta ti Federation of Free Workers (FFW) nga agarup lima a milion a trabahador ti agpegpeggad a maawanan iti panggedanda ita a tawen gapu iti AI ken panagbalbaliw ti klima.
Dinakamat ti FFW ti pattapatta ti International Monetary Fund (IMF) a 14 a porsiento ti dagup a trabahador iti pagilian ti agpegpeggad a sukatan ti AI. Segun iti report ti IMF idi Disiembre 2024, agarup 36 a porsiento dagiti trabaho iti pagilian ti "nalabit a madalapus" ti AI.
Innayonna a nupay nasurok a kagudua ti “highly complementary,” a mabalin a suportaran imbes a sukatan ti AI dagiti trabaho nga aramiden dagiti mangmangged, 14 a porsiento kadagiti trabahador nga adda iti "low-complementarity" ti agpegpeggad a sukatan ti AI.
Naammuan met iti report ti IMF a "nagduduma ti pannakaisarang iti AI segun iti kinatao, nga agarup kagudua dagiti amin a trabaho nga iggem dagiti babbai ti nakarkaro nga agpeggad, no idilig iti kakapat dagiti lallaki."
