Inaprobaran ti Department of Agriculture (DA) ti panagangkat iti 25,000 a tonelada metriko a nadumaduma a produkto nga ikan a pakairamanan ti salmon, sardinas, kappo, ken pusit para iti panawen manipud Marso agingga iti Mayo.
Kinuna ni Agriculture Secretary Francisco Tiu Laurel a babaen daytoy a direktiba, masigurado nga adda natalged a suplay ti taraon iti pagilian, a manglapped iti posible a panagngato dagiti presio iti merkado.
Ti Filipinas, a maysa nga arkipelago nga addaan iti nabaknang a rekursos ti baybay, ket nagpannuray iti importasion tapno mapagtalinaed a nababa ti presio iti baet ti inflation ti ikan ken taraon nga agtaud iti baybay.
Ti panagangkat iti 25,000 a tonelada nga ikan, a napalubosan iti babaen ti Memorandum Order (MO) No. 12, ket plinano ti National Fisheries and Aquatic Resources Management Council (NFARMC) idi napan a tawen.
Pannakaitantan ti BARMM Election, inanamongan ni Presidente Marcos
Ti NFARMC, maysa a recommendatory body ti DA, ti nangikeddeng iti daytoy nga import ceiling tapno mataming dagiti pakaseknan iti inflation ken mapasayaat ti alokasion ti import volume para kadagiti institutional buyers ken wet markets.
Maawagan a kas “experimental approach,” kinuna ti DA a ti panggep datyoy ket tapno maamiris no ti napagtipon nga import cap ket makatulong a mang-stabilize kadagiti presio kabayatan ti pannakatagtaginayon ti umdas a suplay ti taraon.
Kabayatanna, nabayagen a linaksid dagiti grupo dagiti mangngalap dagiti sayangkat ti gobierno nga agangkat iti taraon gapu iti posible nga epektona iti panagbiag dagiti lokal a mangngalap.
Kas sungbat, inrason ni Laurel a daytoy baro a batch ti panagangkat iti ikan, “saanna nga apektaran dagiti lokal a mangngalap.”
Kinunana a makatulong ketdi daytoy a mangpalag-an iti panagnegosio para iti industria ti ikan.
“Nayonan pay daytoy dagiti klase ti ikan nga adda iti merkado, nangruna para iti food service industry, gapu ta dagiti species ti ikan a sakupen daytoy nga importasion ket kaaduanna nga ikan ken produkto ti baybay a saan a makalkalap iti lokal,” kinuna ni Laurel iti maysa a statement.
Mairaman kadagiti maangkat nga ikan ken produkto nga ikan ti Alaska pollock, barramundi, bluefin tuna, capelin, Chilean seabass, cobia, bacalao, croaker, eel, emperor, fish meat, flounder, gindara, grouper, hake, halibut, hamachi, hoki, lobster, marlin, moonfish, mussels, mullet, octopus, oil fish, oyster, pangasius, red snapper, scallops, sea bream, silverfish, smelt, soft and hardshell crabs, swordfish, tuna by-products, ken yellowtail sole. (Dexter Barro II/MANILA BULLETIN)
