Saan a panangpunas iti historia, wenno panangbarengbareng kadagiti nagun-od manipud iti historikal a rebolusion, ti saan a panangideklarar iti Pebrero 25 wenno ti maika-39 nga anibersario ti EDSA People Power a kas working holiday.
Daytoy ti sungbat ni Malacañang Press Officer Claire Castro ita nga aldaw, Pebrero 25, iti pannakababalaw ni Presidente Ferdinand Marcos Jr. gapu iti saanna a panangideklarar iti Pebrero 25 a kas non-working holiday sipud pay idi 2023.
Segun ken ni Castro, ti baro nga undersecretary ti Presidential Communications Office (PCO), saan a lapdan ti presidente dagiti tao a manglagip iti EDSA People Power.
Impaganetgetna a ti saan a panangideklarar ni Marcos iti Pebrero 25 a kas special non-working holiday, dina kaipapanan a kayatna a baliwan ti historia.
China, inlibakna a nagkiddaw ni Duterte iti asylum
Kinuna ni Castro nga awan ti bilin ni Marcos a mangpasardeng kadagiti aktibidad a panglaglagip iti EDSA People Power sipud nagtugaw a presidente.
Innayon ni Castro nga awan ti asino man a makabael a mangpukaw iti historia, uray pay ti presidente.
Inlawlawag ni Castro a saan naideklarar a kas non-working holiday ti Pebrero 25 ita a tawen tapno maallukoy dagiti tao a makipaset iti ania man a pasken a manglagip iti EDSA People Power.
Nupay saan pay a nangiruar ni Marcos iti opisial a mensahena iti pananglagip iti EDSA People Power, impaganetget ni Castro nga allukoyen ti presidente amin nga umili a makipasetda kadagiti aktibidad a manglagip iti People Power.
Maipapan kadagiti pagadalan a nangsuspenso iti klaseda ita nga aldaw, kinuna ni Castro a siwawaya dagitoy a manglagip iti People Power Revolution. (Betheena Unite/Manila Bulletin//Lito Hilidon/Bannawag)
