Saan a nakarit dagiti barko ti China no kadua dagiti barko ti Armed Forces of the Philippines (AFP) dagiti pagilian a kaaliado ken gagayyem ti Filipinas bayat ti sangsangkamaysa a panagpatruliada iti West Philippine Sea (WPS).
Segun iti Philippine Navy (PN) itay Pebrero 25, awan man laeng ti immasideg a barko ti China iti Maritime Cooperative Activity (MCA) nga inangay ti PN ken French Navy iti WPS idi napan a lawas, idinto a 120 nautical miles ti kaadayoda.
Kinuna ni Rear Adm. Roy Vincent Trinidad, pannakangiwat ti PN iti WPS, a gapu ta umad-adu nga umad-adu ti makikadua iti Filipinas nga agpatrulia iti WPS, marigatan ti China a mangipakita iti kinaranggasna kadagiti barko ti Filipinas.
Malaksid iti France, nakagun-od met ti PN iti kasapulan unay a tulong kalpasan a nagkari ti Japan a tulonganna ti Filipinas a mangpapigsa iti kabaelanna iti taaw. (Martin Sadongdong/Manila Bulletin//Lito Hilidon/Bananawag)
