Kiniddaw ti Korte Suprema (SC) iti Kamara a sungbatanda ti petision nga impila dagiti vlogger a mangipaspasardeng iti pannakaimbestigar dagiti maipagarup a palso ken malisioso a paskil iti social media.
Iti resolusion nga impaulog ti SC, binilinna da House Speaker Martin Romualdez, da Diputado Robert Ace S. Barbers, Dan S. Fernandez, Tobias M. Tiangco, ken Jose S. Aquino II a mangidatag iti komento iti las-ud ti 15 nga aldaw.
Tamingen ti SC ti kalikagum dagiti nagpetision a temporary restraining order (TRO) apaman a maawatda ti komento dagiti respondent.
Dimmatag iti Korte Suprema dagiti vlogger a da Ernesto S. Abines Jr., Glenn Chong, Mark Anthony Lopez, Mary Jean Q. Reyes, Dr. Richard T. Mata, May Catherine Diaz Binag, Ethel Pineda Garcia, Krizette Laureta Chu, Jonathan A. Morales, Lorraine Marie Badoy Partosa, Rose Beatrix L. Cruz Angeles, Aeron S. Pena, Nelson U. Guzmanos, Elizabeth Joie Cruz, Suzanne Batalla, Kester John Tan, ken George Ahmed G. Paglinawan.
Dip. Paolo Duterte, napalubosan nga agbiahe iti 17 a pagilian
Segun kadakuada, linabsing ti panagimbestigar ti Kamara ti kalinteganda iti nawaya a panagipeksa ken iti prensa.
Kinunada a ti insayangkat ti Kamara a panagimbestigar para iti lehislasion ket maysa a pananglapped iti kalintegan nga ipapaay ti Konstitusion. (Rey G. Panaligan/Manila Bulletin//Lito Hilidon/Bannawag)
