SIUDAD TI BAGUIO. Impakaammo ti Baguio Flower Festival Foundation Inc. idi Mierkoles, Pebrero 26, dagiti nangabak iti grand flower float parade ti maika-29 a Panagbenga Festival a naangay idi Pebrero 23.
Ti float ti Jollibee Foods Corp. ti nangabak iti large category, ti Mang Inasal iti medium category, ken ti Zaparita’s Gardens iti small category. Idi napan a tawen, maikadua ti Jollibee iti isu met la a kategoria.
Dadduma pay a nangabak iti large category: McDonald’s, maikadua; ken Tourism Infrastructure and Enterprise Zone Authority (TIEZA), maikatlo. Iti medium category: maikadua ti Zaparita’s Garden, ken maikatlo ti Chowking. Iti met small category: maikadua ti Wood Rock and Flowers Group, ken maikatlo ti Wilcon Depot.
Inngato ti BFFFI ti cash prize para kadagiti nangabak ita a tawen. Aganay a ₱700,000 ti premio para iti large category, manipud iti dati a ₱500,000. Nanayonan met ti premio dagiti dadduma pay a kategoria.
3 nga ubbing, natay iti uram idiay Pangasinan
Maangay ti awarding ceremony para kadagiti nangabak kabayatan ti closing ceremony inton Marso 2, a pakaitampokan ti silent drill ti Philippine Military Academy ken grand fireworks display.
Kabayatanna, mapan a 200,000 a tattao ti nagbuya iti Panagbenga Festival ken awan ti nairekord a krimen bayat ti street dancing ken flower float parade idi Pebrero 22 ken 23.
Segun ken ni hepe ti Baguio City Police Office PCol. Ruel Tagel, agarup 60,000 ti nagbuya iti street dancing ken 140,000 ti nagbuya iti flower float parade. (Zaldy Comanda/MANILA BULLETIN)
