Masapul a marepaso ti Republic Act (RA) No. 11934 wenno ti SIM Registration Act, kinuna ni Sekretario ti Presidential Communications Office (PCO) Claire Castro ita nga aldaw, Pebrero 27.
Insingasing ni Castro a maisayangkat nga onsite, saan nga online, a mairehistro dagiti SIM cards gapu iti nakadidillaw a pagkapuyan ti linteg ta agraira latta met dagiti text scam.
Patien ni Castro a maysa kadagiti wagas a tapno malapdan ti text scam, irehistro dagiti SIM card iti maysa a lugar a kas maar-aramid no agala iti lisensia wenno clearance iti National Bureau of Investigation (NBI).
Kinuna ni Castro a no online ti panagrehistro iti SIM card, mabalin a mabarengbareng laeng ti linteg ta makarehistro met latta uray usaren ti rupa ti sunggo, a kaipapananna a mabalin nga agrehistro ti uray asino lattan.
Polis a wanted iti panagrames, natiliw kalpasan ti ilalasatna iti EDSA busway
Segun ken ni Castro, adu ti gumatgatang iti binulto a SIM card sa ilakoda kadagiti sindikato, isu a rumbeng a maatur daytoy, ken nasaysayaat no personal ti panagrehistro.
Itay kallabes, maysa ti Presidential Anti-Organized Crime Commission (PAOCC) kadagiti ahensia a nangipalgak iti parikut iti SIM Registration Act, ta adda makapagrehistro uray agusar iti palso nga impormasion ken retrato. (Argyll Cyrus Geducos/Manila Bulletin//Lito Hilidon/Bannawag)
