Imbilin ni Senate President Francis Escudero ti pannakabukel ti maysa nga administrative support group a tumulong iti Senado bayat nga agsagsagana daytoy nga agbalin nga impeachment court para iti pannakabista ni Bise Presidente (BP) Sara Duterte.
Impakaammo ni Escudero ita nga aldaw, Pebrero 27, ti pinirmaannan nga Special Order No. 2025-015 a mangmandar iti pannakaibukel ti naurnos a support system tapno masigurado ti naanayas a pannakaaramid ti proseso ti impeachment.
Maibatay iti SO 2025-015, ti Secretary of the Senate ket agbalin a kas Clerk of the Senate kas maysa nga impeachment court a mangiwanwan iti administratibo ken proseso mainaig iti Rules of Procedure on Impeachment Trials.
Napusgan ti Sekretario a mangiruar kadagiti administrative order, directive, ken pagalagadan no kasapulan.
Polis a wanted iti panagrames, natiliw kalpasan ti ilalasatna iti EDSA busway
Ti Senate Secretariat ti mangipaay iti legal, teknikal, administratibo ken seguridad a suportar iti Clerk of Court.
Mairaman met ti Office of the Senate Legal Counsel, a napusgan a mangaramid kadagiti subpoena, writ, summon, order, ken legal nga instrumento, agraman ti pannakaisagana ti legal memoranda ken mangsalimetmet iti exhibits a maidatag iti Impeachment Court.
Ti Office of the Deputy Secretary for Legislation ti mangaramid iti transcription ken journal ti pannakabista, mangsaluad kadagiti opisial a dokumento, ken mangisurat iti resolusion ti Impeachment Court; idinto a ti Office of the Sergeant-at-Arms ti mangbantay iti seguridad ken urnos, mangipaay kadagit legal a dokumento, ken mangsigurado ti nasayaat a kababalin iti Senado bayat ti pannakabista. (Wilnard Bacelonia/PNA//Lito Hilidon/Bannawag)
