Indatag ti Commission on Elections (Comelec) ita nga aldaw, Pebrero 28, ti darum a maibusor ken ni Jerryll Respicio, agngayangay a bise mayor ti ili ti Reina Mercedes, Isabela, gapu iti mapapati a panaglabsingna iti cybercrime law kalpasan nga inwaragawagna iti social media a kabaelanna a manipularen ti proseso ti eleksion.
Ni Respicio ti umuna a kandidato nga indarum ti Task Force KKK (Katotohanan, Katapatan at Katarungan) mainaig iti panaglabsing iti Cybercrime Prevention Act.
Binukel ti Comelec ti Task Force KKK tapno mangsaranget kadagiti panagwaras ti palso nga impormasion babaen ti moderno a teknolohia kas iti artificial intelligence (AI).
Segun ken ni chairman ti Comelec George Garcia, mangidatag pay ti Task Force KKK iti disqualification case ken disbarment case kontra ken ni Respicio.
Polis a wanted iti panagrames, natiliw kalpasan ti ilalasatna iti EDSA busway
Impakdaar ni Garcia a kastoy ti aramidenda kadagiti asino man a mangiwaras iti mainaig iti eleksion a palso nga impormasion, saan a laeng a maipapan iti Comelec no di ket pay kadagiti kandidato ken dadduma pay a tao.
Sinupiat ni Garcia ti kinuna ni Respicio a kabaelan daytoy a manipularen ti eleksion ket impaganetgetna saan a ma-hack ti election system.
Innayon ni Garcia a kabaelanda a sukimaten no husto ti bilang dagiti botos.(Joseph Pedrajas/Manila Bullet//Lito Hilidon/Bannawag)
