Indauluan ni Presidente Ferdinand Marcos Jr. ti pannakalukat ti 600-metro a kalepleppas a paset ti Pasig River Esplanade iti Intramuros, Siudad ti Manila idi Pebrero 27.
Iti pannakaleppas ti Phase 3 ti Pasig River Urban Development Project, patien ni Presidente Marcos nga ad-adu pay ti mabukel a pakasaritaan ken pakalaglagipan iti pannakapapintas ti Pasig River Esplanade.
Kinuna ti Presidente a napintas ti buya ti Pasig River Espalande a magusgustuan a pagpasiaran dagiti tattao nangruna dagiti Gen Z ken Gen Alpha wenno agtutubo. Adu pay dagiti mapmapan ag-shooting para iti prenup dagiti agkakallaysa.
Innayon ni Marcos ti kapateg ti pagsayaaatan iti kagimongan ken ekonomia nga ipaay ti pannakapapintas ti Pasig River Esplanade.
Polis a wanted iti panagrames, natiliw kalpasan ti ilalasatna iti EDSA busway
Ti Phase 3 ti proyekto a Pasig Bigyang Buhay Muli (PBBM) nga agarup 600 a metro ti kaatiddogna, ket buklen ti tallo a paset: Plaza Mexico, Maestranza Esplanade, ken Fort Santiago Riverwalk.
Imbalakad ti Presidente kadagiti ahensia a nairaman iti pannakaparang-ay ti Pasig River Esplanade nga itultuloyda ti gannuatda a mangpapartak iti pannakaparang-ay dagiti dadduma a paset daytoy a proyekto, tapno mataripato ti historia, kultura ken masakbayan ti Filipino. (Betheena Unite/Manila Bulletin//Lito Hilidon/Bannawag)
