Dinayaw ni Diputado Rufus Rodriguez (Cagayan de Oro 2nd District) ti Associate Justice ti Korte Suprema (SC) a ni Amy Lazaro-Javier gapu iti "panangisakitna kadagiti minilion a miembro ti PhilHealth."
Rinaem ni Rodriguez ti panangkuestionar ni Lazaro-Javier bayat ti oral arguments nga insayangkat ti SC maipapan iti pannakayakar ti agdagup ti ₱89.9 a bilion a pondo ti Philippine Health Insurance Corporation (PhilHealth) iti National Treasury.
Ni Rodriguez ti maysa kadagiti diputado a nangkuestionar iti pannakayakar iti pondo ti PhilHealth, ket patienna a nalabsing ti Constitution ken dadduma pay a linteg.
Bayat ti panangsaludsodna ken ni Solicitor General Menardo Guevarra, kinuna ni Lazaro-Javier nga eksklusibo a mausar ti pondo ti PhilHealth para kadagiti programa ti ahensia ken kadagiti benepisio dagiti miembro, ken saan a mayallatiw iti awan pakainaiganna a panggep.
Polis a wanted iti panagrames, natiliw kalpasan ti ilalasatna iti EDSA busway
Dinakamat ni Javier a nairuar ti ₱89 a bilion a para iti pannakabangon ti maysa a rangtay a di pay pulos narugian ket namin-adun a naikkan iti pondo, ken iti nabayadanen a right of way a binilion a pisos ti gatadna, ken iti panangmantener kadagiti kalsada a naponduanen iti binilion a pisos babaen ti GAA. (Ellson Quismorio/Manila Bulletin//Lito Hilidon/Bannawag)
