Inkari dagiti dadaulo dagiti pagilian iti Europa, iti waragawagda idi Pebrero 28, a dida baybay-an ti Ukraine kalpasan ti nagdinamag a pasamak iti panagsasarita da Presidente ti Estados Unidos Donald Trump, Bise Presidente JD Vance, ken Presidente ti Ukraine Volodymyr Zelenskyy iti Oval Office ti White House, ti panangsuportarda iti kaarrubada a pagilian.
Nariribukan dagiti dadaulo ti Europa iti panagbitla ni Vance iti Munich Security Conference dua a lawasen ti napalabas a kas man nangisuro kadakuada maipapan iti kasasaad ti demokrasiada. Bayat ti panagdardaras dagiti prime minister ken presidente dagiti pagilian iti entero a kontinente a sumungbat, nangangayda iti agsasaruno nga emergency summit tapno pagsasaritaanda ti maipapan iti seguridad.
Adda pay maangay a dakkel a taripnong iti London inton Marso 2 a sangailien ni Prime Minister ti U.K. Keir Starmer tapno pagsasaritaanda ti maipanggep iti Ukraine ken iti seguridad.
Kinuna ti maysa nga opisial ti Ukraine a nakipatangen ni Zelenskyy ken ni Presidente ti France Emmanuel Macron, kas met ken ni Secretary General ti NATO Mark Rutte, ken ni Presidente ti European Council Antonio Costa, kalpasan a naggapu ti presidente ti Ukraine iti White House. Inyebkas dagitoy nga agtalinaed ti panangsuportarda iti Ukraine.
Polis a wanted iti panagrames, natiliw kalpasan ti ilalasatna iti EDSA busway
Nangyebkas met iti mensahe a panangsuportar dagiti dadaulo dagiti pagilian nga Estonia, Sweden, Germany, Austria, Czech Republic, Denmark, Finland, Latvia, Lithuania, Norway, Poland, ken Spain. (Associated Press/Manila Bulletin//Lito Hilidon/Bannawag)
